नीरज चोपडा पॅरीस ऑलिम्पिकाक पात्र

भांगरभूंय | प्रतिनिधी

नीरज चोपडान आपल्या पयल्याच यत्नांत 88.77 मिटर भालो फेक करून संवसारीक अॅथलेटिक्स वस्तादपण सर्तीचे फायनलींत सुवात मेळयली, तशेंच पॅरीस ऑलिम्पीक 2024ची पात्रताय लेगीत निश्चीत केली. टोकियो ऑलिम्पिकांत भांगरा पदक जैतिवंत नीरज चोपडान कारकिर्दींतलें चवथें सर्वोत्कृश्ट प्रदर्शन केलें.

पॅरीस ऑलिम्पिकाची पात्रताय मेळोवपा खातीर 85.50 मिटर भालो फेंक करप गरजेचें आशिल्लो. पात्रताय विण्डो एक जुलय सावन उक्तो आसा. चोपडाचें वैयक्तीक सर्वोत्कृश्ट प्रदर्शन 89.94 मिटर आसा. ताणें हें प्रदर्शन 30 जून 2022क स्कॉटहोम डायमण्ड लिगेंत केल्लें.

मजगतीं, नीरज चोपडा खेरीत किशोर जेना (80.75 मिटर) आनी डी पी मनू (81.31 मिटर) ह्या भारतीय खेळगड्यां खेरीत पाकिस्तानाच्या अर्शद नदीम (86.79 मिटर) हाणें लेगीत फायनलींत सुवात मेळयली. चोपडान अ गटांत पयली सुवात मेळयली, जाल्यार ब गटांतल्यान अर्शद नदीमान पयली सुवात मेळयली. फायनल 27 ऑगस्टाक जातली.

मजगतीं, पाकिस्तानाच्या नदीमान लेगीत पॅरीस ऑलिम्पिकाची पात्रताय मेळयली.

फाटले संवसारीक अॅथलेटिक्स वस्तादपण सर्तींत नीरजाक रुप्या पदकाचेर समाधान मानचें पडिल्लें. अॅण्डरसन पिटर्सनान 90.54 मिटर भालो फेक करून भांगरा पदक जिखिल्लें. हे खेपे पिटर्सन अ गटांत सातवे सुवातेर उरलो.

भारताक संवसारीक अॅथलेटिक्स वस्तादपण सर्तींत अजून मेरेन भांगरा पदक जिखपाक जमूंक ना. भारता वतीन बॉबी जॉर्ज हिणें 2003त लांब उडी प्रकारांत कांश्या पदक जिखिल्लें. ते उपरांत म्हणल्यार 19 वर्सांनी नीरजान रुप्या पदक जिखिल्लें.