भांगरभूंय | प्रतिनिधी
दोन खेपेचो ऑलिम्पिक पदक जैतिवंत नीरज चोपडान पॅरीस डायमण्ड लीग 2025त उत्कृश्ट प्रदर्शन करतना 88.16 मिटरा मेरेन भालो फेक केलो आनी जर्मनीच्या ज्युलियन वेबराक फाटीं घालून किताब आपल्या नांवार केलो.
डायमण्ड लिगेंत 90 मिटरा परस मुखार भालो मारपाचो आपलो यत्न आशिल्लो. पूण रन-अप जलद जाल्ल्यान गतीचेर नियंत्रण दवरप आपल्याक जमूंक ना. तरीपूण, डायमण्ड लीग जिखून खूब खोशी जाल्या. कारण फाटल्या कांय म्हयन्यां सावन आपल्याक किताब जिखपाक जमूंक नाशिल्लो अशें ताणें सांगलें.
हाचे पयलीं नीरजान मे म्हयन्यांत दोहा डायमण्ड लिगेंत 90.23 मिटरा मेरेन भालो फेक केल्लो. कारकिर्दींतलें ताचें हें सर्वोत्कृश्ट प्रदर्शन आशिल्लें. पूण, त्या वेळार ज्युलियन वेबरान 91.06 मिटर भालो फेक करून पयली सुवात मेळयिल्ली, जाल्यार नीरजाक दुसरे सुवातेर समाधान मानचें पडिल्लें.
ह्या हंगामा खातीर नीरज सध्या झेक प्रजासत्ताकाचो दिग्गज जान जेलेजनी वांगडा सराव करता. जेलेजनीन आपले कारकिर्दींत 90 मिटराचें अंतर 50 परस अदीक खेपे हुपला. तशेंच 1996त 98.48 मिटर भालो फेक करून संवसारीक विक्रम आपल्या नांवार केल्लो. हो विक्रम अजून ताच्या नांवार आसा.
ज्युलियन वेबराक दुसरी सुवात फावो जाली. ताणें 87.88 मिटर थ्रो करून दुसरी सुवात मेळयली. जाल्यार ब्राझिलाच्या लुईस मॉरिसियो दा सिल्वाक तिसरी सुवात फावो जाली. ताणें 86.62 मिटर थ्रो केलो.
फाटल्या तीन सर्तींनी पयलेच खेपे नीरजान वेबराक हारयलो. सध्याच्या डायमण्ड लीग हंगामाची निमाणी मॅच 27 आनी 28 ऑगस्टाक स्वित्झर्लेण्डाच्या झ्युरीच शारांत जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
