नीरज चोपडाची मोहीम आयच्यान

भांगरभूंय | प्रतिनिधी

भारताचो नीरज चोपडा आयज स्टेड दी फ्रान्सांत दादल्यांच्या भालो फेक सर्तींत वांटो घेतलो. नीरज चोपडा सध्याचो ऑलिम्पीक वस्ताद आनी संवसारीक चॅम्पीयन आसा.

2020चे टोकियो ऑलिम्पिकांत नीरज चोपडान भालो फेक प्रकारांत भांगरा पदक जिखून इतिहास घडयिल्लो. ऑलिम्पिकांत अॅथलेटिक्स सर्तींत पदक जिखपी तो भारताचो पयलो अॅथलीट थारिल्लो.

सगल्या फिल्ड सर्ती भशेन भालो फेक सर्तींत लेगीत क्वॉलिफिकेशन रावण्ड आनी फायनल पदक फेरये सयत दोन टप्प्यांनी सर्त जातली.

क्वॉलिफायींग रावण्डांत 32 खेळगड्यांक अ आनी ब अशा गटांनी विभागल्यात. अॅथलीट 84.00 मिटराच्या क्वॉलिफायींग स्टॅण्डर्ड मेळोवन थेट फायनलींत सुवात मेळोवपाक शकतले.

अ गटः जुलीयस येगो (केनिया), ओलिवर हेलॅण्डर (फिनलॅण्ड), लिंड्रो रामोस (पुर्तुगाल), केशोर्न वाल्कोट (त्रिनिदाद आनी टोबॅगो), किशोर जेना (भारत), तेउरा’इटेरा’ई तुपैया (फ्रान्स), जुलियन वेबर (जर्मनी), रोडरिक जेनकी डीन (जपान), एलेक्जेंड्रू मिहैता नोवाक (रोमानिया), डेविड वेगनर (पोलॅण्ड), टोनी केरेनन (फिनलॅण्ड), इहाब अब्देलरहमान (इजिप्ट), कर्टिस थॉम्पसन (यूएसए), पॅट्रिक्स गेलम्स (लातविया), पेड्रो हेनरिक रोड्रिग्स (ब्राझील), जॅकब वाडलेज्च (चेकिया)

ब गट: नीरज चोपडा (भारत), गॅटीस कॅक्स (लातविया), मॅक्स डेहिंग (जर्मनी), कॅमरून मॅकएंटायर (ऑस्ट्रेलिया), अरशद नदीम (पाकिस्तान), मार्सिन क्रुकोव्स्की (पोलॅण्ड), लस्सी एटेलाटालो (फिनलॅण्ड), ननमदी चिनेचेरेम (नायजेरिया), लुइज मॉरिसियो दा सिल्वा (ब्राझील), मुस्तफा महमूद (इजिप्ट), आर्टुर फेल्फनर (युक्रेन), टिमोथी हरमन (बॅल्जियम), एंडरसन पिटर्स (ग्रेनाडा), एंड्रियन मार्डारे (मोल्दोवा), एडिस माटुसेविसियस (लिथुआनिया), सायप्रीयन मिर्जग्लोड (पोलॅण्ड).

मजगतीं, युवा बॅडमिंटन खेळगडो हाका कांश्या पदकान हुलकावणी दिली. कांश्या पदका खातीर जाल्ले मॅचींत ताका मलेशियाच्या ली जी जिया कडल्यान 21-13, 16-21 आनी 10-21 अशी हार घेवची पडली.

भारतीय बायलांच्या टेबल टॅनीस पंगडान घडयलो इतिहास

भारतीय बायलांच्या टेबल टॅनीस पंगडान पॅरीस ऑलिम्पिकांतले आपले मोहिमेक जबरदस्त सुरवात केली. दक्षीण पॅरीस हांगा जाल्ले रावण्ड ऑफ 16चे उमळशीक वाडोवपी मॅचींत भारतान रोमानिया पंगडाक 3-2 हारोवन क्वॉर्टरफायनलींत सुवात मेळयली.

अर्चना कामत आनी श्रीजा अकुला हे जोडयेन दोट्टी गटांत भारताक बरी सुरवात करून दिली. तांणी पयले मॅचींत आदिना डायोनू आनी एलिझाबॅथ समारा हे जोडयेक 11-9, 12-10 आनी 11-7 अशा फरकांनी हारयली. ह्या जैता सयत भारतान 1-0 अशी आघाडी घेतली.

ते उपरांत भारताची टेबल टॅनीस स्टार मनिका बत्रान भारताची आघाडी वाडयली. तिणें संवसारीक क्रमवारींत 10वे सुवातेर आशिल्ले बर्नडेट स्झोक्स हिका 11-5, 11-7 आनी 11-7 अशा सरळ सेटांनी हारयली. अशे तरेन भारतान 2-0 अशी आघाडी घेतली.

श्रीजा अकुला तिसरी मॅच खेळपाक आयली. पूण, एकोड्या गटांतले मॅचींत तिका हार घेवची पडली. एलिसाबेटा समारान तिका पांच गेमींनी हारयली. युरोपीयन चॅम्पीयन समारान श्रीजा हिका 8-11, 11-4, 7-11, 11-6 आनी 11-8 अशा फरकान हारयली.

चवथे मॅचींत अर्चना कामथीन निरशेणी हाडली. तिका बर्नाडेट स्झोक्सान 11-5, 8-11, 11-7 आनी 11-9 अशी हारयली. अशे तरेन रोमानियान 2-2 अशी बरोबरी सादली.

ताका लागून मॅच पांचवे मॅचींत गेली. हे निर्णायक लडतींत मनिका बत्रान एडिना डायकोनू हिका 11-5, 11-9 आनी 11-9 अशा सरळ गेमींनी हारयली आनी भारताच्या बायलांच्या टेबल टॅनीस पंगडान पयलेच खेपे क्वॉर्टरफायनलींत सुवात मेळयली.