भांगरभूंय | प्रतिनिधी
सुमार एका म्हयन्याचे विसवा उपरांत पुनरागमन करपी नीरज चोपडान लुसान डायमण्ड लिगेंत 87.66 मिटर भालो फेक करून भांगरा पदक जिखलें.
नीरजान पांचव्या यत्नांत भांगरा पदक मेळयलें. दुखापती उपरांत सुमार एक म्हयन्यान पुनरागमन करपी नीरजाची सर्तीक खूब बरी सुरवात जाली ना.
ताचो पयलो यत्न फाऊल थारलो. पूण, उपरांत नीरजान नेटान पुनरागमन करीत जर्मनीच्या ज्युलियन विबर आनी झेक प्रजासत्ताकाच्या याकुब वादलेज्चे हांकां फाटीं घालीत पयली सुवात मेळयली.
नीरज चोपडाचें हें आठवें आंतरराष्ट्रीय भांगरा पदक थारलें. हाचे आदीं ताणें आशियायी खेळांत, दक्षीण आशियायी खेळांत, ऑलिम्पीक सारक्या सर्तींनी भांगरा पदकां जिखिल्लीं. अंदूं ताणें जिखिल्लें हें दुसरें भांगरा पदक थारलें. वर्साचे सुरवातीक नीरज चोपडान दोहा डायमण्ड लिगेंत भांगरा पदक जिखिल्लें.
ते उपरांत स्नायू दुखाविल्ल्यान ताका कांय सर्तीं चुकिल्ल्यो. ते उपरांत लुसान डायमण्ड लिगे वरवीं ताणें पुनरागमन केलें. ताचो पयलो यत्न फाऊल थारलो. ते उपरांत दुसऱ्या यत्नांत नीरजान 83.52 मिटर भालो फेक करून नेटान पुनरागमन केलें. तिसऱ्या यत्नांत ताणें 85.04 मिटर भालो फेक केलो. पूण, 86.20 मिटर भालो फेक करपी ज्युलियन विबर आघाडेर आशिल्लो.
नीरजान चवथ्या यत्नांत परतून एकदा फाऊल केलें. ताका लागून ताचेर पांचवे फेकी वेळार चेपण आशिल्लें. पूण, ताणें चेपणाक बळी पडनासतना नेटान भालो फेक केलो. हे खेपे ताचो भालो 87.66 मिटर पयस गेलो आनी ताचें भांगरा पदक निश्चीत जालें.
ज्युलियन विबरान 87.03 मिटर भालो फेक करून रुप्या पदक जिखलें, जाल्यार झेक प्रजासत्ताकाच्या याकुब वादलेज्चे तिसरे सुवातेर उरलो. 86.13 मिटर भालो फेक करून ताणें कांश्या पदक जिखलें.
मुरली श्रीशंकराक अपेस
नीरजा खेरीत लांब लॉंग जम्पर मुरली श्रीशंकरान लेगीत डायमण्ड लिगेंत वांटो घेतिल्लो. ताणें सुरवातीच्या पांच यत्नांत 7.75, 7.63, 7.88, 7.59 आनी 7.66 मिटर लांब उडी मारली. पूण, हो स्कोर पदक जिखपाक फावसो नाशिल्लो. तो पांचवे सुवातेर उरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
