भांगरभूंय | प्रतिनिधी
पुर्णपणान तंदुरुस्त जाल्लो भारताचो भालोफेक खेळगडो नीरज चोपडा आयज जावपी डायमंड लीग सर्तींत वांटो घेवपाक सज्ज आसा. हे लिगेंत इतिहास घडोवपाची ताका बरी संद आसा.
24 वर्सां पिरायेचो नीरज ‘ग्रोईन स्ट्रेन’ दुखापतींतल्यान पुर्ण बरो जाला. ताका ही दुखापत फाटल्या म्हयन्यांत अमेरिकेंत जाल्ले संवसारीक वस्तादपण सर्तींत इतिहासीक रुप्या पदक जिखपाच्या वेळार जाल्ली.
आयज जावपी सर्तींत तो पयल्या तिनांनी सुवात मेळोवपाक येसस्वी थारता जाल्यार नीरजाची झ्युरिचांत 7 आनी 8 सप्टेंबराक जावपी डायमंड लीग फायनल्सांतली सुवात निश्चीत जातली. कारण सध्या तो सात गुणां सयत गुणतकट्यांत चवथे सुवातेर आसा. स्टॉकहॉम डायमंड लिगेंत तो दुसरे सुवातेर उरिल्लो.
गुणतकट्यांत पयल्या स सुवातांचेर येवपी अॅथलेटिकांक झ्युरिच फायनल्सांत सुवात मेळटली. लुसान डायमंड निमाणो टप्पो आसा.
एक म्हयन्याच्या विसवा उपरांत नीरज आपलो फाटलो फॉर्म कायम राखपाक येसस्वी थारतलो काय ना आयज कळटलें. डायमंड लीग सर्त जिखपाची ताका भांगराळी संद आसा.
चोपडा पयलीं डिस्कस थ्रो अॅथलीट विकास गौडा डायमंड लिगेंत पयल्या तिनांनी सुवात मेळोवपी एकोडो भारतीय खेळगडो आसा. गौडान 2012 न्युयॉर्क आनी 2014त दोहांत दोन खेपे दुसरी सुवात मेळयिल्ली. हाचे खेरीत 2015त शंघाय आनी युजीन हातूंत तिसरे सुवातेर आयिल्लो.
टोकियो ऑलिम्पिकांत रुप्या पदक जिखपी जाकुब वाडलेच हो लुसानांत वांटो घेतलो. झेक प्रजासत्ताकाचो हो अॅथलीट 20 गूण घेवन गुणतकट्यांत पयले सुवातेर आसा. ताच्या उपरांत जर्मनीच्या ज्युलियन वेबर (19 गूण) आनी ग्रेनाडोचो संवसारीक वस्ताद अॅण्डरसन पिटर्स (16 गूण) तिसरे सुवातेर आसा.
वेबर दुखापतीक लागून लुसानांत वांटो घेवचो ना. त्रिनिदाद अॅण्ड टोबेगोचो केशोर्ण वाल्कॉट लेगीत पदकाचे सर्तींत आसा. तीन अॅथलीट नीरजाच्या फाटल्यान आसा. हातूंत लातिव्हियाचो गॅटीस काक्स आनी पॅट्रिक्स गबेलम्स तशेंच अमेरिकेचो कर्टिस थॉम्पसन आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
