भांगरभूंय | प्रतिनिधी
हालींच दोहा डायमण्ड लिगेंत नीरज चोपडान 88.36 मिटर भालो फेक करीत रुप्या पदक जिखिल्लें. पूण, अॅथलेटिक्सच्या फॅडरेशन करंड सर्तींत ताणें भांगरा पदक जिखलें. पूण, ताची कामगिरी सरासरीची जाली. नीरजान 82.27 मिटर भालो फेक करून भांगर जिखलें, जाल्यार ताचो प्रतिस्पर्धी डी पी मनून 82.06 मिटर भालो फेक करीत रुप्या पदक जिखलें. उत्तम पाटीलान 78.39 मिटरा सयत कांश्या पदक मेळयलें.
तीन वर्सांनी देशांतर्गत सर्तींत वांटो घेवपी नीरज चोपडाच्या प्रदर्शनाचेर सगल्यांचें लक्ष आशिल्लें. दोहांत 88.36 मिटर फेक करून लेगीत ताका रुप्या पदकाचेर समाधान मानचें पडिल्लें. ताका लागून भुवनेश्वरांत लेगीत दोहा भशेन कामगिरी करतलो अशी सगल्यांक आस्त आशिल्ली. पूण, ताणें वट्ट स मिटर उणें अंतर हुपून आपल्या सामान्य फेकीचें प्रदर्शन घडयलें. नीरजान 82 मिटराच्या लागसार भालो फेक करून लेगीत भांगरा पदक जिखलें. ताची सर्वोकृश्ट कामगिरी 89.94 मिटर आसा. फाटल्या तीन वर्सां सावन तो 90 मिटर हुपपा खातीर खर मेहनत करीत आसा.
हे सर्तीतल्यान लेगीत भारताच्या भालो फेक खेळगड्यांक ऑलिम्पिका खातीर पात्र जावपाची संद आशिल्ली. नीरज आनी किशोर जेना पयलींच पात्र थारल्यात. ताका लागून दोगांकूय फॅडरेशन करंड लिगे खातीर थेट प्रवेश दिल्लो. नीरजान भांगरा पदक जिखलें. पूण, जेनाक अचूक भालो फेक करपाक जमलो ना. हेर खेळगड्यांक ऑलिम्पिकाची पात्रताय मेळोवपाक 85.50 मिटराचें अंतर हुपप गरजेचें आशिल्लें. पूण, कोणाकूच तें हुपपाक जमलें ना. जे पात्र थारले ते लेगीत किमान अंतर हुपपाक शकले नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
