भांगरभूंय | प्रतिनिधी
नवी दिल्ली, खबरां संस्था ः नीट-यूजी सारकिल्ल्या म्हत्वाच्या परिक्षांनी जावपी गैरवेव्हार आडावपा खातीर सात वांगड्याच्या तज्ञ समितीन केल्ल्यो शिफारशी केंद्र सरकार चालीक लायतले अशी म्हायती काल बिरेस्तारा सर्वोच्च न्यायालयात दिली.
निवृत्त इस्रोचे मुखेली के. राधाकृष्णन हांच्या अध्यक्षते खाला नॅशनल टेस्टिंग एजन्सीचे काम आनी कार्यपद्दतीचो नियाळ घेतले उपरांत ही समिती स्थापन केल्ली. नीट-यूजी परिक्षा चड पारदर्शक आनी गैरवेव्हार मुक्त करपा खातीर बदल सुचवपाचें काम समिती कडेन दिल्लें. ते प्रमाण समितीन देशभरांतल्यान सुचोवण्यो मागयल्ल्यो. ते उपरांत समितीन केंद्र सरकाराक अहवाल सादर केलो. बिरेस्तारा न्या. पी. एस. नरसिंहा आनी न्यायाधीश मनोज मिश्रा हांच्या खंडपिठा मुखार सॉलिसिटर जनरल तुषार मेहता हांणी ह्यो सगल्यो शिफारशी सरकार चालीक लायतले अशें सांगलें. देशभरांत 37 हजार सुचोवण्यां उपरांत समितीन 101 शिफारशी केल्यो.
देशभरांतल्यान 37,144 सुचोवण्यो आयिल्ल्यो, 23 बसका उपरांत समितीन 101 शिफराशी केल्यात तातूंतल्यो कांय मुखेल सुचोवण्यो….
१. देशांत 101 चांचणी केंद्रां आसपाक जाय. तें सरकारी शाळांनी, म्हाविद्यालयांनी, संस्थांनी आसूंक जाय. पुलीस सत्यापना उपरांतच खाजगी संस्थांक केंद्रां दिवचीं. पयसुल्ल्या वाठारांनी बशींतल्यान भोंवपी चांचणी केंद्र करचे.
२. कागद सेट करप, छापप, सांठोवप आनी येरादारी सयत प्रस्नपत्रकां संबंदीत दरेक प्रक्रियाचेर नियंत्रण दवरपा खातीर एनटीएचो वरिश्ठ अधिकाऱ्याक दवरचो.
३. एनटीएन फकत उच्च शिक्षण प्रवेशा खातीर 15 प्रवेश परिक्षा घेवच्यो. भरती परिक्षा घेवची न्हय.
४. नॅशनल टेस्टिंग एजन्सीचे पुनर्स्थापना करची. १० व्हर्टिकल आसूंक जाय. सहसचिव दर्जाच्या अधिकाऱ्यांचो हे समितींत आस्पाव करचो.
५. एनटीएन फुडल्या सगळ्या परिक्षांनी संगणक प्रणालीन सुरक्षीत केल्लो पेन-पेपर मोड आपणावचो.
६. विद्यार्थ्यांच्या कागाळी निवारणा खातीर खाशेलो कक्ष स्थापन करचो.
७. परिक्षेचो ताण उणो करपा खातीर मेंटल हेल्थ सेल आनी टेली हेल्पलायन सेवा आसपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
