भांगरभूंय | प्रतिनिधी
नवी दिल्ली, खबरां संस्था ः ‘नीट-यूजी’ 2024 परिक्षेच्या पवित्रतेचेर धक्को बसला हें पळोवन सर्वोच्च न्यायालयान मंगळारा केंद्र सरकार आनी नॅशनल टेस्टिंग एजन्सीक (एनटीए) नोटीस जारी केल्या. देशभरांत घेतिल्ल्या ‘नीट- यूजी’ परिक्षेंत पेपर लिक आनी हेर गैरवेव्हार जाल्ल्यान परीक्षा रद्द करून परतून घेवची अशी मागणी करीत विद्यार्थ्यांनी, पालकांनी आनी हेरांनी सर्वोच्च न्यायालयांत याचिका दाखल केल्यात.
शिवांगी मिश्र आनी हेर एमबीबीएस अभ्यासक्रमांत प्रवेश घेवपाक इत्सूक आशिल्ल्या णव उमेदवारांनी दाखल केल्ले याचिकेचेर न्यायाधीश विक्रमनाथ आनी न्यायाधीश अहसानुद्दीन अमानुल्ला हांच्या खंडपिठामुखार ही सुनावणी जाली. केंद्र सरकार आनी एनटीए हांकां याचिकादारांच्या आरोपांक जाप दिवची अशें खंडपिठान सांगलें. पूण एमबीबीएस, बीडीएस आनी हेर वैजकी अभ्यासक्रमांत प्रवेश घेवपी येसस्वी उमेदवारांचें समुपदेशन बंद करपाक न्हयकार दिलो. याचिकादारांच्या आरोपांची दखल घेवन नीट- यूजी’ परिक्षेंत जाल्ल्या प्रकरणा विशीं आमकां जाप जाय अशें न्यायालयान सांगलें. खंडपिठान केंद्र सरकार आनी ‘एनटीए’ तशेंच बिहार सरकाराक नोटीस जारी केल्या. बिहारांतय परिक्षेंत गैरवेव्हार जाल्ल्याचे आरोप जाल्ले. ‘नीट -यूजी’ परिक्षा 5 मे दिसा जाली. ताचो निकाल 14 जून दिसा जावपाचो आशिल्लो तो 4 जूनाकच जाहीर जालो. तातूंत जायत्या विद्यार्थ्यांनी 720 पैकी 720 गूण मेळयले. उपरांत परिक्षेंत गैरवेव्हार जाल्ल्याचे आरोप जाले.
संबंदीत याचिकांची बरोबर सुनावणी
‘नीट-यूजी’, 2024 वर्साचे परिक्षेचो निकाल येवचे पयलीं गैरवेव्हार जाल्ल्याचो आरोप करून दोन याचिका दाखल केल्यात. ते संबंदी सरन्यायाधीश धनंजय चंद्रचूड हांच्या फुडारपणा खाला खंडपिठान केंद्र सरकार आनी एनटीएक नोटीस जारी केल्या. शिवांगी मिश्र आनी हेरांनी दाखल केल्ली याचिका प्रलंबीत याचिके वांगडा जोडपाक खंडपिठान परवानगी दिली. 8 जुलया उपरांत नेमान खंडपिठा मुखार सुनावणी जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
