नीट, जेईई परिक्षां विशीं शिक्षकांक खबर नासप ही चिंतेची गजालः मुख्यमंत्री

भांगरभूंय | प्रतिनिधी

पणजीः कांय उच्च माध्यमीक शिक्षकांक ‘नीट’, ‘जेईई’ हें कितें तें खबरुच ना. ही हुस्को करपा सारकी गजाल जावन आसा. अशे स्थितींत ते विद्यार्थ्यांक कितें शिकयतले? असो प्रस्न मुख्यमंत्री डॉ. प्रमोद सावंत एससीईआरटीच्या करिअर गायडन्स कार्यावळींत उप्रासलो.
डॉ. सावंत हांचे हस्तुकीं गोवा करीअर नेव्हीगेटर- २०२५ हे करीअर गायडन्स कार्यावळीचे कला अकादमीत उक्तावण जालें. राज्य शिक्ष़ण संशोधन आनी प्रशिक्षण परिशद (एससीईआरटी) हांणी युनोक्यू प्रो इड्युटेक हांच्या जोडपालवान ही कार्यावळ घडोवण हाडिल्ली. ह्या वेळार एससीईआरटीची संचालक मेघना सेटगांवकार, शिक्षण संचालक शैलेश झिंगडे, तांत्रिकी शिक्षण संचालक डॉ. विवेक कामत, युनोक्यूचे संस्थापक धवल गांधी, राहील शहा आनी हेर मानेस्त हजर आशिल्ले.
गोंयांत खुबशे भुरगे जेईई आनी नीट परक्षेंत टॉप करतात. तशेंच खुबश्या भुरग्यांक जेईई आनी नीट कितें हे खबर लेगीत ना. हे खातीर हांव पालकांक न्हय तर शिक्षकांक जापसालदार धरतां, अशें मुख्यमंत्र्यान विद्यार्थ्यांक मार्गदर्शन करतना सांगलें.
बारावेंत शिकपी भुरग्यान जेईई परिक्षा दिवंक नाशिल्ल्यान तांकां आभियांत्रिकी महाविद्यालयांत प्रवेश घेवपाची संद चुकली. जेन्ना ताका जेईई परिक्षा कित्याक दिवंकना अशें विचारल्यार तांणी सांगलें, ताका जेईई परिक्षा कितें? काय विचारलें आनी आभियांत्रीकी शिक्षण घेवपाक गरजेचे आसां हें ताका खबर लेगीत नाशिल्लें, अशें मुख्यमंत्र्यान सांगलें.
हे परिक्षे विशीं म्हायती दिवप हे उच्च माध्यमीक शिक्षकांचें काम. मात चडश्या शिक्षकांक जेईई आनी नीट परिक्षा कितें हाची कसलीच म्हायती ना हें आयकून म्हाका तांची किव येता. जर तांकां हे विशी कसलीच म्हायती ना जाल्यार हे शिक्षक शिकयतले तरी कितें? असो प्रस्न मुख्यमंत्र्यान उप्रासून कोण येवन तुमकां सांगतलो म्हणून कोणचारे निंबून रावूं नाकात, असो सल्लो विद्यार्थ्यांक दिलो. फुडलीं ७० ते ८० वर्सां आमका रावपाक जाय जाल्यार आतां कितें करप हें विशी निर्णय घेवचो पडटलो. देखून सरकार तुमचें करीअर घडोवपा खातीर अट्टहास करता. करीअर मार्गदर्शन हें शिक्षणीक धोरण वा अभ्यासक्रमाचो भाग ना. तुमची कुशळटाय आनी आवडी प्रमाण तुमचें करीअर आतां घडोवपाक जाय, ताची सुरवात करपाक जाय, अशो उलो मुख्यमंत्र्यान विद्यार्थ्यांक मारलो.