भांगरभूंय | प्रतिनिधी
पंचायत वेंचणुकांचो लोगाे, टी शर्टाचें अनावरण
भांगरभूंय I प्रतिनिधी
पणजी : 10 ऑगस्टाक जावपी गोंयांतल्या पंचायत वेंचणुकांच्या लोगोचे राज्य वेंचणूक आयुक्त डब्ल्यू. व्ही. रमणमूर्ती हांचे हस्तुकीं अनावरण जालें. गोंय मनरिजवण संस्थेंत ही कार्यावळ आयोजीत केल्ली. ह्या वेळार तांचे वांगडा उत्तर गोंय जिल्होधिकारी मामू हागे, दक्षीण गोंय जिल्होधिकारी ज्योती कुमारी, गोंय राज्य वेंचणूक आयोगाचे सचीव विजेश मणेरकार आनी गोंय राज्य आयोगाचे सहाय्यक सचीव सागर गुरव हाजीर आशिल्ले.
गोंयांत जावपी पंचायत वेंचणुकां खातीर पयलेचे खेपे गोंय राज्य वेंचणूक आयोगान लोगाचे अनावरण केलां. गोंयांतल्या सामान्य जिणेचें चित्रण दाखोवपी, गोंयची परंपरा आनी संस्कृतीचे दर्शन घडोवपी हो लोगा आसा, अशी म्हायती राज्य वेंचणूक आयुक्त डब्ल्यू, व्ही. रमणमूर्ती हांणी दिली.
गांवचे उदरगती खातीर पंचायतींची म्हत्वाची भुमिका आसा, अशी मूळ संकल्पना दवरून मतदाना विशीं सोशल मिडिया, रेडियो आनी प्रिंट मिडिया हांच्या आदारान जनजागृताय करतात, अशें रमणमूर्ती हांणी सांगलें.
तरणाट्यां मदीं आनी पुराय गोंयांतल्या लोकां मदीं जागृताय मोहिमेचो एक भाग म्हूण हो लोगो आशिल्ले टी-शर्टाचें लेगीत अनावरण ह्या वेळार जाले.
10 ऑगस्टाक मतदान, 12 ऑगस्टाक मतमेजणी जातली. स्वतंत्र आनी निश्पक्ष वेंचणुकां खातीर जिल्होधिकाऱ्यां कडल्यान कलम 144 खाला खर निर्बंध लागू केल्यात. लोकशाय घटमूट करपाक लोकशायेच्या उत्सवांत दरेकल्यान वांटेकार जावचे, अशें आवाहन वेंचणूक आयोगा वतीन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
