भांगरभूंय | प्रतिनिधी
राजेंद्र आर्लेकार : दीनदयाळ इंटीग्रेटेड हॉस्पिटलाक दिली भेट
भांगरभूंय । प्रतिनिधी
दिवचल : निश्ठेन केल्लें कसलेंय काम येसस्वी जाताच. पं. दीनदयाळ उपाध्याय हांचे प्रेरणेन दीनदयाळ संस्थेन आपल्या संघटण कुशळटायेच्या नेटार दिवचल वाठारांत पयलें इंटीग्रेटेड हॉस्पिटल बांदपाचो निश्चेव केलो आनी तो पुराय करपाचे दिशेन पावलां मारलीं. तांचो उपक्रम समाजा खातीर आदर्श समाजीक सेवा उपक्रम आसा, अशें केरळचे राज्यपाल आनी गोंयचे पूत राजेंद्र आर्लेकार हांणी सांगलें.
आर्लेकार हांणी बिरेस्तारा दीनदयाळ संस्थे वतीन बांदिल्ले पयले इंटीग्रेटेड हॉस्पिटल इमारतीची पळोवणी केली आनी तांच्या ह्या समाजीक योगदानाचें कवतूक केलें. इंडियन ऑयल कॉर्पोरेशना वतीन समाजीक सेवा उपक्रमा खाला ह्या हॉस्पिटला खातीर सुमार 20 कोटी रुपया खर्च आयला. ताचो चडसो खर्च इंडियन ऑयल कॉर्पोरेशना खाला केला. हे खातीर स्वता आर्लेकार हांणी इंडियन ऑयल कॉर्पोरेशना कडेन चर्चा करून हो निधी उपलब्ध करून दिवचे खातीर म्हत्वाचें योगदान दिलां.
आर्लेकार हांणी सांगलें, ह्या प्रकल्पाक आदार करचे खातीर आपूण फक्त निमित्त मात आसा. सगळ्यांच्या आदाराक लागून आनी सेगीत फाटपुरवण, निश्ठा, समाजा विशीं आशिल्ली संवेदना, आपुलकीची भावना हाका लागून दिवचल सारक्या शारांत दर्जेदार इंटीग्रेटेड म्हणल्यारूच आयुर्वेद आनी एलीपॅथी हांचो सांगोड घालपी पयलें सुसज्ज हॉस्पिटल उबें जालां. हाचो आपल्याक अभिमान दिसता, अशें तांणी सांगलें.
ह्या हॉस्पिटलाची इमारत पुराय जाल्या. साधन सुविधा, मशिनां बसोवपाचें काम बेगिनूच सुरू जातलें. फुडल्या स म्हयन्यां भितर कामां पुराय जावन हॉस्पिटलाचें लोकार्पण करतले, अशें अध्यक्ष वल्लभ साळकार हांणी सांगलें.ट
आमदार डॉ. चंद्रकांत शेट्ये हांणी सांगलें, दीनदयाळ संस्थेन समाजीक सेवा मळार हें इंटीग्रेटेड हॉस्पिटल बांदून आदर्श घालून दिला. सवलतीच्यादरांत दुयेंतींक सेवा मेळटली. ताका लागून ताचो खूब जाणांक फायदो जातलो, अशें तांणी स्पश्ट केलें.
इंटीग्रेटेड हॉस्पिटल म्हूण सुरवेक सावन उबें रावपी हें पयलें हॉस्पिटल आसा, अशें डॉ. शेखर साळकार हांणी सांगलें.
ह्या वेळार कांतां पाटणेकार, नगराध्यक्ष विजयकुमार नाटेकार, डॉ. कौस्तूभ पाटणेकार, नगरसेवक तशेंच संस्थेचे संचालक, वांगडी, अधिकारी हाजीर आशिल्ले.
ह्या वेळार आर्लेकार हांणी पुराय हॉस्पिटल इमारतीची पळोवणी केली. हे मुखार लेगीत सगळे तरेचो आदार दिवपाची तांणी हमी दिली.
वल्लभ साळकार हांणी येवकार दिलो.
शिक्षण लेगीत इंटिग्रेटेड आसचें : आर्लेकार
जे तरेन हॉस्पिटलांत आयुर्वेदीक, होमियोपॅथीक, एलोपॅथी हांचो उपचार पद्दतींचो वापर जाता, तेच धरतेर शिक्षण लेगीत आतां इंटीग्रेटेड आसचें. अशी भावना राज्यपाल राजेंद्र आर्लेकार हांणी उक्तायली. अशे तरेचो यत्न विदेशांत केला. भारतांत लेगीत तो करपाची गरज आसा. ताका लागून सर्वसमावेशक आदर्श शिक्षण वेवस्था येतली, अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
