निश्ठावान साहित्यीकाचें चरित्र : आयवीस तावारीसाच्या जिविताची कथा

भांगरभूंय | प्रतिनिधी

ह्या संवसारांत जायते मनीस जल्मतात आनी आप- आपली यात्रा ताणीत आसतात.  कोण गिरेस्त जाल्यार कोण गरीबूच उरता. थोड्यांचो सूट- बूट घालून नेट जाल्यार थोड्यांची सादेपणान पावलां. थोडे झेत आनी गर्व दाखयतात जाल्यार थोडे बॉल्सांत व्हडल्यो पदव्यो आसूनय मान पोंदाक घालून खाल्तिकायेन चलतात. हें कशें जावं येता? एक सादी गजाल, डच प्रधानमंत्री मार्क रुट्टे हाणें 14 वर्सां पद भुसयलें आनी एका घोटाळ्यांत सामील जावंचो पडटा म्हण राजकारणांतलें नांव सांबाळूंक ताणें राजिनामो दिलो. अधिकृतपणान ऑफिसाचो ताबो सोंपोवन तो आपल्या घरा वतना कसो गेलो? एक सायकल घेवन. केदो व्हड मनीस आनी कितली खाल्तिकाय? असोच म्हज्या शेजारच्या राशोल (जुंव्यार) गांवचो आयवीस तावारीस. आंगान बारीक, पळेवंक इल्लोसो, सामको सादो, खाल्ती पूण ताणें गोंयांतूच न्हय तर संवसारांत नांव मेळयलें. ताचेर जॉस्लीन फेर्नांडीसान ‘आयवीस तावारीसाच्या जिविताची कथा’ हें पुस्तक बरयलें. ताचे खातीर जॉस्लीनाक खुब-खुब परबीं. ह्या पुस्तकाक 146 ग्लॉसी पानां आसात. तें सेंट थॉमस प्रिंटजोन हाणें छापलां आनी जुजे सेबास्तियाना फेर्नांडीसान उजवाडायलां.

फाटभूंय

आयवीस एक साबार गुणांचो मनीस. तो कथा, कविता, लेख बरयता. ते शिवाय तियात्र बरयता हें सरभोंवतणच्या लोकाक खबर आसाच, पूण जेन्ना ताणें रोमन कोंकणी बिब्लीकल कॉनकॉर्डन्स  (पवित्र पुस्तकांतलें भांडार) हें पुस्तक उजवाडायलें, तेन्ना इतिहास घडलो. तांतूत अदमास 2,03,71,309 अक्षरां सयत 36,98,550 उतरांचो आस्पाव आसा. पुस्तकाची उंचाय 5.5 फूट आनी वजन सुमार 180 किल आसा. ह्या पुस्तकान स विक्रम मोडले – भारताचो संवसारीक विक्रम (सगल्यांत लांब विक्रम), संवसारीक भारत विक्रम (संवसारांतलें सगळ्यांत व्हडलें पुस्तक), भारताचें विक्रमी पुस्तक (सगल्यांत दाट पुस्तक), आशिया पुस्तक विक्रम (सगल्यांत दाट पुस्तक), चॅम्पियन्स बुक ऑफ वर्ल्ड विक्रम (सगळ्यांत लांब पुस्तक) आनी युनिव्हर्सल रेकॉर्ड फोरम. हें सगळें घडटकच ताचे फाटल्या इतिहासाचेर उजवाड पडूंक जाय आशिल्लो. ताचो  वावर कश्ट, वळवळे, त्याग संवसारा मुखार हाडूंक जाय आशिल्ले. बिब्लीकल कॉनकॉर्डन्सा वरवीं राशोलाच्या इल्ल्याश्या गांवान आनी कोंकणी भाशेन नांव जोडलें.  देखून आपल्या गांव-भावाचो अभिमान बाळगून जॉस्लीनान आयवीसा वयर पुस्तक बरोवंचो निर्णय घेतलो. आपले आवय कडल्यान आयवीसा विशीं आयकल्ल्या गजालींच्या प्रभावान आनी पुस्तकाच्या उग्तावणे वेळार उचारिल्ल्या आयवीसाच्या भावनांनी हें पुस्तक रुप घेवंक पावलें. तशी ही संद म्हज्या वांट्याक आयिल्ली. हांवूय ताचे करणेन प्रभावीत जाल्लों, पूण हांवें हात घालचे पयलींच जॉस्लीनान ही संद घेतली आनी हांव फाटीं सरलों. ह्या पुस्तक रचणेचे संकल्पनेक गांवच्या लोकाचोय हातभार आसा.

आयवीस तावारीस कोण?

“आयवीस एक बरोवपी आनी स तियात्रांचो दिग्दर्शक. सुमार आठ वर्सां ताणें बिब्लीकल कॉनकॉर्डन्साचें काम केलें. सुरवातेक ताका अदमास नाशिल्लो तें केदें जातलें म्हण. आपल्या मनांत आशिल्ली मांडावळ जाग्यार घालूंक तो वावरीत रावलो. मदल्या काळांत ताणें जायत्या जणांचो आधार घेतलो, दुडवांचो तसोच आपणाक गरज त्या वस्तुंचो, तांतुंत येता कंप्युटर्स, ऑफीस आनी आधारी स्टाफ.  हें हाताळपी एक बरो संघटक, एक देवसंदेशकार आनी पत्रकारितेंतूय मिसळ जाल्लो.  ताका शेतकामताचो मोग, गरिबांचो आस्कारी, तसोच फुटबॉल मोगी.  एक दीस ताणें पेद्याचो पासून वावर केलो हें एका पाठांत वाचूंक मेळटा.  आपल्या गांवांत ताणें आल्कॉहॉलिक्स अनोनीमस जमो घडलो. लेजन ऑफ मेरीचो पाटलावदार. सेवाधर्मीक सेवक, डायोसीजन कुटुंब सेवा केंद्राचो वांगडी तसोच आकाश्वाणी आनी दुरदर्शन कलाकार. शिवाय ताणें प्रायव्हेट डिटॅक्टीव कोर्स केला. ‘भितरल्या मनाचो मनीस’ ह्या कोंकणी चलचित्राचो तो निर्मातो. असो, म्हुर्ती ल्हान पूण किर्ती म्हान.

पुस्तकाचो गाभो

‘आयवीस तावारीसाच्या जिविताची कथा’, ह्या पुस्तकांत आयवीसाचे बरे तशे वायट अणभव वाचप्यां खातीर दिल्यात. राशोलच्या गांवचे म्हायतीन पुस्तकाची सुरवात जाता आनी तातुंतूच ताचें जिवीत. आयवीसाचें भुरगेपण आनी ताचे कारनामे, तियात्र आनी चलचित्र, सेवा आनी धर्मीक विचार, बराबर गरीब- जाणट्यां सवें मोग आनी मोयपास. ताच्या कांय तियात्रांची म्हायती आनी ते माचयेर हाडूंक, तशेंच पवित्र पुस्तकांतलें भांडार उबें करूंक जाल्ले कश्ट आनी आटाविटे ल्हान-ल्हान विभागांनी बरोवप्यान बरयल्यात. ताचे भलायकेचेरूय उजवाड घाला. हांव दाल्गादो अकादेमीचो अध्यक्ष आसतना आयवीसाच्या म्हान कार्याचो दोन फावटीं भोवमान जाला, हाचोय उल्लेख आसा. 

खाशेलेपण

जेजुचीं उतरां ह्या पुस्तकांत मेळटात, ‘कोणूय नांगराक हात घाले उपरांत, फाटल्यान वळून पळेता तो मनीस म्हाका युक्त न्ही. तुजें काम तूं करीत राव, आनीक शार्ती पावय.’ हीच पयली एक देख ह्या पुस्तकांतली.  बरोवप्यान म्हण्ण्यांचोय वापर केल्लो वाचूंक मेळटा. राशोल गांवचीं रंगीत चित्रां ह्या पुस्तकांक सोबाय हाडटात.  ते शिवाय आयविसाची एक सुरबूस जिविताची गांथण आनी ताणें अणभविल्लो मातयेचो वास, फुलांचो गंध आनी जुआरी नदीच्या उदकाची खारसाण. पुस्तकांतली कथा चडशी आयवीसा भोवंतीच घुंवता हें बरोवप्यान आदींच स्पश्ट सांगलां.  ताच्या पवित्र पुस्तकांतल्या भांडाराचे आनी ताच्या पुरस्कारांचे फोटू लेगीत पळेवंक मेळटात.

बरोवपी जॉस्लीनाचे उमाळे

“हांवें आयवीसाच्या जिविताची कथा बेश्टीच बरोवंक ना. तो पळेवंक सादो दिसता. गुगल सर्च मारीत जाल्यार  आयवीसाच्या नांवार आशिल्लो ‘वर्ल्डस बिगस्ट रोमान कोंकनी बिब्लीकल कॉनकॉर्डन्स’, हो टायटल मेळटा. हे शिवाय, स रिकॉर्ड्स ब्रेक केल्ले आसात. जाल्यार हो आयवीस म्हणटा तो सादो मनीस जालो? ताचें आख्खें जिवीत वाचले उपरांत ताणें केला तो वावर एका साद्या मनशाचो जालो? आख्ख्या भारताक, गोयकारांक, रोमान कोंकणी समाजाक, क्रिस्ती समाजाक, तियात्रिस्तांक, आनी भोव करून आमच्या जुंवेकारांक अभिमानाचीच गजाल, एक म्हान मनीस आमकां देवान दिल्ले पासत. रेकॉर्ड्सां पासत, … आयवीस तावारीसाच्या जिविताची कथा हांगाच सोंपना. ताका लांब आवक रावता.” 

सोंपयतना…

‘तूं म्हज्या फाटीर मार ना जाल्यार पोटार मार, पूण म्हाका आधार दी.’ ही आयवीसाची उतरां मनांत धरून खरेंच आयवीसाक दुडवांची गरज आसा.  खूब जणांनी ताका आधार केला पूण जें भांडार ताणें उबें केलां, तातूंतल्यान ताका वाट काडची आसा. ताच्या कश्ट-व्हळव्हळ्यांची म्हायती सुरवातेक दिल्या, ताचें जतन करपूच एक आव्हान आसा. पुरस्कारांचे रितीन तरी थोडी रक्कम ताका मेळची हो हावेस हांव व्यक्त करतां आनी जॉस्लीनान असलीं आनीकूय बरपां करून कोंकणी सरस्पतीक गिरेस्त करूंक विनंती करतां.

– विन्सी क्वाद्रूस, 

9822587498