भांगरभूंय | प्रतिनिधी
1925 पदां भरपाची जायरात डिसेंबर सावन सुरू
पणजी ः आतां सावन निश्चित आशिल्ल्या पदांचोच आंकडो आनी म्हायती सरकारी खात्यांक कळोवप सक्तीचें आसा. पयलीं सारकें प्रस्तावीत (तयार जावपाची शक्यताय) कर्मचाऱ्यांचो आंकडो कळोवप सक्तीचें ना. गोंय कर्मचारी भरती आयोगाच्या नेमांत दुरुस्ती केल्या. दुरुस्ती अधिसुचोवणी जारी केल्या. कर्मचारी भरती आयोगा वरवीं 1925 पदां भरपाची जायरात डिसेंबर सावन सुरू जातली.
कर्मचारी भरती आयोगाच्या नेम 4 त हो बदल केला. हेर कांय नेमांतय बदल केल्यात. उमेदवारान अर्जा वांगडा गरजेचीं प्रमाणपत्रां सादर करूंक नात वा चुकीचीं प्रमाणपत्रां सादर केल्यांत जाल्यार कसलीच कळोवणी दिनासतना अर्ज न्हयकारपाचो अधिकार आयोगाक आसतलो. भरती आयोगाच्या नेम 5 त हो बदल केला.
पयलीं परिक्षा सभाघरांत उण्यांत उणे 2 निरिक्षक नेमप सक्तीचें आशिल्लें. आतां ताचे बदला उण्यांत उणो 1 निरिक्षक नेमप पुरो. भरती आयोगाच्या नेम 10 त हो बदल केला.
कांय पदां खातीर कुशळटायेची चांचणी (स्कील टेस्ट) घेवची पडटा. ही कुशळटाय चांचणी आतां आयोग अधिकाऱ्यांच्या समिती वरवीं घेवंक शकता. कुशळटाय चांचणी आयोग स्वता वा खातें, एजन्सी वा नेमिल्ले अधिकारी समिती वरवीं घेवंक शकता. तशेंच आतां सावन वेंचून काडिल्ल्या उमेदवारांच्या वळेरेंत 40 टक्के वा वेटिंग लिस्टांतले 5 उमेदवार आसतले. हाचे पयलीं वेटिंग लिस्टांतले 25 टक्के वा 2 उमेदवार आस्पावताले. निवड वळेरे वांगडाच पदांच्या आंकड्याच्या 40% प्रमाण आशिल्ली वा 5 उमेदवारांची वेटिंग लिस्ट तयार करतले. पयलीं वेटिंग लिस्ट 25 टक्के वा 2 उमेदवारांची आशिल्ली. हो बदल नेम 12 त केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
