भांगरभूंय | प्रतिनिधी
राज्याचे गांवगिरे अर्थवेवस्थेच्या अहवालाचें मुख्यमंत्र्यां हस्तुकीं प्रकाशन
पणजी : राज्यांत २०२० ते २०२४ ह्या ४ वर्सांनी ५० टक्के निश्क्रीय आशिल्ले स्वयंसाहाय्य गट सक्रीय जाल्यात. तशेंच ह्याच काळांत स्वयंसाहाय्य गटांत घरकाम करपी मनीस ६० टक्क्यांनी वाडल्यात. राज्याचे गांवगिरे अर्थवेवस्थेच्या अहवालाचें मुख्यमंत्री डॉ. प्रमोद सावंत हांचे हस्तुकीं प्रकाशन जालें. ह्या अहवालांत ही म्हायती दिल्या.
केंद्र आनी राज्य सरकाराच्या विवीध येवजण्यांक लागून गांवगिरी अर्थवेवस्था चालीक लावपाक बायलांचो फुडाकार आसा. स्टार्ट अप वीलेज एंट्रेप्रेनरशीप प्रोग्राम, प्रधानमंत्री मायक्रो फूड प्रोसेसींग एंटरप्रायझेस सारकिल्ल्या येवजण्यांच्या कारवायेक लागून गांवगिरी अर्थवेवस्था चालीक लागिल्ल्याचें मुख्यमंत्र्यांनी सांगलें. मुंबयच्या टाटा इन्स्टीट्यूट ऑफ सोशल सायन्स संस्थेन ‘गोवा लायवलीहूड फोरम’च्या सहकार्यान हो अहवाल तयार केला.
गोंय राज्य ग्रामीण लायवलीहूड मिशनांत चार वर्सांनी ग्रामीण संघटनांचो वांटो १३१ टक्क्यांनी वाडला. स्टार्ट अप विलेज एंट्रेप्रेनरशीप कार्यावळींत (एसवीईपी) ५५६ टक्क्यांनी वाड जाल्या. प्रधानमंत्री मायक्रो फूड प्रोसेसींग एंटरप्रायजीस (पीएमएफएमयी) चो लाव घेवप्यांचें प्रमाण ४ वर्सांनी २५१ टक्क्यांनी वाडलां. ह्या वेळार ग्रामीण विकास मंत्री गोविंद गावडे हजर आशिल्ले.
अहवालांतल्यो हेर मुखेल गजाली
-क्लस्टर लेवल फेडरेशना वतीन (सीएलएफ) समाजीक गुंतवणूक निधींतली (सीआयएफ) रक्कम स्वयंसाहाय्य गटांक दितात. हे निधींत ४ वर्सांनी ४८०० टक्के वाड. १०६९ स्वयंसाहाय्य गटांक लाव.
-विवीध उपक्रमां खातीर स्वयंसाहाय्य गटांक दिवपी निधींत ४ वर्सांनी ४४५ टक्के वाड. ३३५४ स्वयंसाहाय्य गटांक लाव.
-एग्रो इकोलोजीकल प्रॅक्टीसीस (एईपी) येवजणे खाला बायलां शेतकारांच्या प्रमाणांत ४ वर्सांनी १५६४ टक्के वाड.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
