भांगरभूंय | प्रतिनिधी
पणजीः निवृत्त शिक्षकांक प्रोव्हिडंट फंड (पीएफ) रक्कम मेळपाक कळाव जाल्ल्यार संबंदीत विद्यालयाच्या मुख्यध्यापकाक व्याज दिवपाचे निर्देश गोंय मानवाधिकार आयोगान दिल्यात. मुख्याध्यापकान 48 लाख 54 हजार 225 रुपयांच्या रकमेचेर 7 म्हयन्यां खातीर 6 टक्के व्याज निवृत्त शिक्षकाक दिवचें असो आदेश आयोगान दिला. संबंदीत मुख्यध्यापकान 30 दिसां भितर व्याज दिवंक ना जाल्यार सहाय्यक शिक्षण संचालक आनी शिक्षण संचालकांनी व्याजाची रक्कम दिवची आनी ती शाळेच्या वर्सुकी अुनदानातल्यांन वजा करची अशें आयोगान अहवालांत म्हणलां.
मानवाधिकार आयोगाचे अध्यक्ष डेस्मंड डिकोस्ता आनी वांगडी प्रमोद कामत हांणी हो अहवाल दिलो.
निवृत्ती उपरांत प्रोव्हिडंट फंडाची रक्कम मेळपाक कळाव जाल्ल्याची कागाळ काणकोणच्या प्रेमानंद पागी हांणी मानवाधिकार आयोगा कडेन केल्ली. ह्या प्रकरणांत श्राद्धानंद विद्यालयाचे मुख्यध्यापक, सहाय्यक शिक्षण संचालक आनी शिक्षण संचालक हांकां कळयलें. ह्या प्रकरणांत सुनावणी घेवन आयोगान हो आदेश दिलो. संबंदीत शाळेच्या प्रशासनाक लागून सहाय्यक शाळांच्या निवृत्त कर्मचाऱ्यांचो प्रोविडंट फंड (जीपीएफ) निकालांत काडपाक कळाव जाल्यार संबंदीत शाळेक 6 म्हयन्यां परस चड काळा खातीर (जीपीएफ नियम ११(४) खाला) व्याज दिवचें पडटलें. संबंदीत शाळेन व्याज दिवंक ना जाल्यार शाळेच्या अनुदानांतल्यान ही रक्कम काडून शिक्षण खात्यान दिवची असो आदेश सरकारान जारी केला. शिक्षण संचालकान ही गजाल आयोगा मुखार मांडल्या.
30 एप्रील 2024 दिसा निवृत्ती पयलीं गरजेची औपचारिकताय पुराय करूंक नाशिल्ल्यान मुख्याध्यापकान कागाळ करपी शिक्षकाक दोश दिल्लो. प्रोव्हिडंट फंड रक्कमेच्या प्रक्रियेक कळाव जावपाक शिक्षक जापसालदार आसा अशें मुख्यध्यापकान सांगलें. मुंबय उच्च न्यायालयाच्या निकाला प्रमाण निवृत्त जावपी कर्मचाऱ्यान सामान्य भविष्य निर्वाह निधीच्या निमाण्या रकमे खातीर लेखी अर्ज सादर करपाची गरज ना. हाचेर आदारून आयोगान मुख्याध्यापकाचो दावो न्हयकारलो. 30 एप्रिल 2024 दिसा निवृत्तीच्या तारखेक कागाळदाराच्या जीपीएफ खात्यांत 46,61,173 रुपया रक्कम भविष्य निर्वाह निधीत आशिल्ली. कळावाक लागून शिक्षण संचालकान 6 म्हयन्यांचें व्याज दिले आनी 26 जून 2025 दिसा कागाळदाराच्या बँक खात्यांत 48,54,225 रुपया जमा केले.
अशे तरेन कागाळदाराक 46,61,173 रुपयांचेर वर्साक 6 टक्के दरान 7 म्हयन्यांचें व्याज मेळूंक नाशिल्लें. सरकारी आदेशा प्रमाण आयच्यान 30 दिसां भितर 46,61,173/- रुपयांचेर 7 म्हयने कळाव जाल्लें व्याज कागाळदाराक 6 टक्क्यांच्या दरान दिवचें. शाळेच्या मुख्याध्यापकान 30 दिसां भितर रक्कम भरली ना जाल्यार मागीर ती रक्कम शिक्षण संचालक आनी सहाय्यक शिक्षण संचालकान उपरांत 30 दिसां भितर ही रक्कम भरची. नेमा प्रमाण शाळेच्या वर्सुकी अनुदानांतल्यान भरिल्ली रक्कम वजा करची अशी शिफारस मानवाधिकार आयोगान केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
