भांगरभूंय | प्रतिनिधी
गोंयांत 2009 वर्सा निवृत्त जाल्ल्या बालवाडी सेविका आनी सहायकांक (हेल्पर) पेन्शनाचे फायदे मेळ्ळें नात. म्हणल्यार
तांची सेवा शून्य पेन्शनान पुराय जाली. हाचे वयल्यान ही सरकारी अर्दवेळ नोकरी काय कितें, असो प्रस्न पडले बगर रावना. आतां ताच्या कुटुंबाची अर्थीक स्थिती सामकी वायट आशिल्ल्यान सरकारान म्हयन्याळी णव हजार रुपया तरी पेन्शन दिवची मागणी त्या कामगारांनी केल्या. नवी सुदारीत वेतन येवजण चालीक लावचे पयलीं सरकारान 2009 ते 2024 मेरेनच्या कामगारांचो विचार केल्यार बरो. दुबाव आसल्यार सरकारान त्या कामगारांच्या जिणेच्या दर्ज्याचें सर्वेक्षण करूं येता. पंचायतीकूय विचारुं शकतात.
गोंय सरकारा कडेन पयलींच 2024 वर्सा बालवाडी सेविका आनी सहायक हांचे खातीर निवृत्ती फायद्याची येवजण आसा. हे येवजणेंतल्यान तांकां निवृत्ती उपरांत एकवटीत अर्थीक मजत मेळटा. पूण दरेका निवृत्त कामगारांक उण्यांत उणें 10,000 रुपया तरी मेळप हो तांचो हक्क. सध्या म्हयन्याक णव हजार पेन्शन दिवची, अशी विनवणी तांणी मुख्यमंत्री डाॅ. प्रमोद सावंत हांकां केल्या.
सरकाराच्या म्हणण्या प्रमाण, फारीक केल्ली रक्कम सेवा वर्सांचेर आदारून आसता आनी ती एका खाशेल्या रकमे मेरेन मर्यादीत आसता. बालवाडी सेविका वा सहायकांक अचकीत मरण आयल्यार तांच्या नामांकीत मनशाक सुपरन्युएशन बेनिफिट दितात. बालवाडी सेविका आनी सहायक हांची निवृत्तीची पिराय 60 वर्सां वयल्यान 62 वर्सां मेरेन वाडयल्या. ह्यो दुरुस्त्यो बऱ्यो आसात, पूण तांणी हेर जायत्यो अतिरिक्त सेवा केल्यात आनी करतात. देखून बालवाडी सेविका आनी सहायकांक म्हयन्याळ्या पेन्शनाचो आग्रो धरतात. म्हयन्याक उण्यांत उणे णव हजार रुपया फारीक करचे. जाचे खातीर ते पात्र आसात. कारण देश सरकारी कर्मचाऱ्यांक सातवो वेतन आयोग दिता. मागीर बालवाडी सेविकांक कांयच म्हत्व ना? आमकां निवृत्त बालवाडी कामगारांक थोडो तरी फायदो मेळपाक नाका अशें बालवाडी कामगार म्हणटात.
भारत सरकारान आंगणवाडी सेविकांचे कामगिरीचेर वा सेवेचेर आदारून येवजण्यो केल्यात. ही एक स्पर्धात्मक येवजण. देखून गोंय सरकारान 2009 सावन निवृत्त आंगणवाडी कामगारांक भरपाय दिवपाचो एक भाग म्हूण पेन्शन येवजण सुरू करपाचो विचार करपाक जाय.
निवृत्त बालवाडी कामगार रंजना मांद्रेकार हांकां हांव मेळ्ळों, तांणी सांगलें, ‘100 रुपया पगाराचेर हांवे सेवा सुरू केल्ली. बार्देशांत बालवाडी कामगार आनी सहायकांचे पगार वाडोवपा खातीर जायते फावट प्रचार आनी आंदोलन केलां. 2009 वर्सा अल्प रक्कम घेवन हांव निवृत्त जालां. अशे बालवाडी कामगार आनी सहाय्यक आसात, जांकां जिवीत जगप जड जालां.’ ही बायल बार्देश तालुक्याची सेविका कामगारांची मुखेली आसली. सरकारान बालवाडी सेविका आनी सहायकांक पेन्शन सुरू करपाचेर विचार करपाक जाय.
हडफडे मार्गान बससेवा ना
म्हापसा बाजारांतली भाजी विकपी जाण्टी बायल श्रीमती शोभवती दिवकार. खाजगी बसचालक रातच्या 8 वरां उपरांत म्हापश्यां सावन हडफडें मेरेन प्रवास करपाक सातत्यान पाळो दिवंक नाशिल्ल्याचो तिणें हुस्को उक्तायलो. ही समस्या सोडोवपा खातीर तिणें म्हापशेंच्या प्रादेशिक येरादारी कार्यालयांत तोंडी समस्या मांडली. पूण…..
तिच्या मतान म्हापशें ते कळंगूट बसचालक रातच्या 8 वरां उपरांत हडफडे मार्केटांतल्यान प्रवासी बसी व्हरनात, पूण नागोवें ते कळंगूट मेरेनचो शॉर्टकट मार्ग वापरतात. देखून प्रवाशांक रातच्या वेळार हडफडे मेरेन सुमार देड किलोमीटर चलून वच्चें पडटा. म्हापशें आरटीओचे सहायक संचालकाक तोंडी कागाळी करून लेगीत बसचालक परत परत अशें करतात आनी प्रवाशांक असुविधा निर्माण करतात. कागाळदार दिवकर ही विधवा, जाण्टी. कश्टकरी बायल. त्या दिसा आरटीओ कार्यालयांत सहायक संचालकाचो वाडदीस आशिल्लो. तेन्ना तिणें प्रवासी बसीं विशीं कागाळ केल्ली आनी केकाचो कुडको लेगीत खाल्लो, अशें तिणें सांगलें. ‘बर्थडे बॉय’ डायरेक्टरान बशीचो प्रस्न सोडोवपाचें उतर दिल्लें, अशेंय तिणें सांगलें. ती आशावादी आशिल्ली. उपरांत बस चालकांनी फकत चार दीस हडफडे मार्केटांतल्यान बसी व्हेल्यो आनी उपरांत मनमानीपणान स्वताचो अनधिकृत मार्ग घेवन कलंगूटे वचपाक लागले.
खाजगी बस चालकांनी ह्या प्रस्ना कडेन लक्ष दिवंक नाशिल्ल्यान कांय प्रवाशांनी आरटीओ कडेन लेखी कागाळ करपाचो निर्णय घेतला. प्रवाशांक तांचेर कारवाय जाल्ली जाय वा थंय आठा उपरांत कदंब बस सेवा सुरू करची, अशें ते मागतात. हडफडे – नागवें ग्राम पंचायतीन येरादारी संचालकाक तसो प्रस्ताव वा थाराव धाडल्यार बरो.
राजेश बाणावलीकार,
वेगासवाडो, हडफडे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
