भांगरभूंय | प्रतिनिधी
पणजीः निवासी प्रकल्पांत हृदयविकार (आताकाचें दुयेंस) जाल्यार पयलीं मजत म्हूण वापरिल्लें स्वयंचलीत बाह्य डिफिब्रिलेटर (एईडी) यंत्रणा बसोवप सक्तीचें केलां. 50 परस चड फ्लॅट आशिल्ल्या निवासी प्रकल्पां खातीर एईडी स्थापन करप सक्तीचें केलां. इमारतींतल्या सगळ्या रहिवाशांनी सहजतायेन मेळपी सुवातेर उपकरणां बसयल्लीं आसचीं. भौशीक भलायकी कायद्यांत बदल हे संबंदी हालींच कळयल्यात. हाचे भायर हांगा रावपी 25 टक्के लोकांक पयल्या उपचाराचें प्रशिक्षण घेवचें पडटलें. हातूंत हृदय-फुफ्फुस पुनर्जीवन (CPR) प्रशिक्षण तशेंच ‘एईडी’ उपकरणांचो वापर करपाचें प्रशिक्षण आसतलें. काळजाचो आताक वा हेर खंयच्याय वैजकी आणीबाणीच्या वेळार मनशाचो जीव वाटावंक शकता अशी म्हायती प्रशिक्षणांतल्यान मेळटली अशी आस्त आसा.
अशें प्रशिक्षण सरकारी मान्यताय मेळिल्ले संस्थे कडल्यान घेवचें पडटा. तशेंच, अशा घरगुती प्रकल्पांच्या नोटीस बोर्डांत पाळपाच्यो प्रक्रिया आनी काळजा संबंदीत वैजकी आणीबाणीच्या वेळार कशी फुडें व्हरची हाची म्हायती आसपावपाक जाय. हे प्रक्रियेची म्हायती सगळ्यांक स्पश्ट आनी सोंपेंपणान दिसपी सुवातेर नोटीस बोर्डाचेर घालची अशें अधिसुचोवणेंत म्हणलां.
हालींच्या वर्सांनी काळजाचो आताक येवपाचें प्रमाण वाडलां. अशा वेळार ‘एईडी’ साधन कामाक येता. हें मतींत घेवन फाटल्या वर्सा नगर नियोजन खात्याचे बसकेंत रेसिडेण्ट प्रकल्पांत एईडी प्रकल्प स्थापन करपाचो निर्णय घेतिल्लो. हाचे प्रमाण नव्या बांदकाम प्रकल्पांक परवानो दितना अशीं उपकरणां आसप गरजेचें केलां. हाचे आदीं भलायकी खात्यान वेपारी आस्थापनांकय एईडी उपकरणां लावपाचो सल्लो दिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
