भांगरभूंय | प्रतिनिधी
ऑस्ट्रेलियेंत हालींच सोंपिल्ले संवसारीक टी-20 सर्तींत टीम इंडियाक मेळिल्ल्या अपेसा उपरांत भारतीय क्रिकेट नियामक मंडळान (बीसीसीआय) चेतन शर्माच्या अध्यक्षतेखालची चार वांगड्यांची निवड समिती बर्खास्त करपाचो निर्णय घेतलो.
बीसीसीआयन निवड समितीच्या पदां खातीर नव्यान अर्ज आमंत्रीत केल्यात. अर्ज करपाची निमाणी तारीख 28 नोव्हेंबर आसा.
संवसारीक टी-20 सर्तीचे सेमी फायनलींत भारताक इंग्लंडा आड 10 विकेटींनी लजेक पडपी हार घेवची पडिल्ली.
पंगड वेंचतना साबार चुकीचे निर्णय घेतले. आतां नव्यान सुरवात करपाची आसा. निवड समितींतल्या कांय वांगड्यांचो कार्यकाळ सोंपपाक आयला. आनी नवीन सुरवात करपाचो आमचो विचार आसा. आमकां जे निकाल अपेक्षीत आशिल्ले ते मेळूंक ना आनी जय शाह मॅलबॉर्नांतल्यान परतून आयल्या उपरांत आमी नवीन निवड समिती नेमपाचो निर्णय घेतलो अशें बीसीसीआयच्या एका अधिकाऱ्यान सांगलें.
अध्यक्ष चेतन शर्माच्या कार्यकालांत भारताक 2021त युएई जाल्ले संवसारीक टी-20 सर्तींत लेगीत अपेस आयिल्लें. त्या वेळार भारताचें आव्हान मुळावे फेरयेंतूच सोंपिल्लें, तशेंच संवसारीक टॅस्ट वस्तादपण सर्तीचे फायनलींत लेगीत भारताक हार घेवची पडिल्ली.
चेतन शर्मा (उत्तर विभाग), हरविंदर सिंग (मध्य विभाग), सुनील जोशी (दक्षीण विभाग) आनी देबाशीश मोहंती (पुर्व विभाग) हांचो हालींच्या काळांत वरिश्ठ राष्ट्रीय निवडकर्ते म्हणून सगल्यांत उणो कार्यकाळ थारलो. हातूंतल्या कांय वांगड्यांची 2020त जाल्यार कांय जाणांची 2021त निवड जाल्ली.वरिश्ठ राष्ट्रीय निवडककर्त्यांक सादारपणान विस्ताराच्या अधीन चार वर्सांचो कार्यकाळ मेळटा. अबेय कुरुविल्लाचो कार्यकाल सोंपल्या उपरांत पश्चीम विभागांतल्यान निवड समितींत प्रतिनिधित्व करपी कोण नाशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
