भांगरभूंय | प्रतिनिधी
हांगझू- चीनांत 23 सप्टेंबर ते 8 आॅक्टोबर मेरेन आशियायी खेळां सर्त जातली. पांच दिसां पयलीं हे सर्ती खातीर युवा वेव्हार आनी खेळां मंत्रालयान 634 खेळगड्यांची वळेरी जाहीर केल्या. 38 खेळां प्रकारांत ते खेळटले. देशा खातीर पदकां जोडटले. भारतीय आॅलिंपीक संघटणेन 850 खेळगड्यांचीं नांवां धाडिल्लीं. तातूंतलीं 216 नांवां भायर मारल्यांत. भितर गोंयचें सेलिंग खेळगडी कात्या कुएल्हो हाचोय आसपाव आसा. फेब्रुवारींत जाल्ले शयर्तींत जिखपी तें पयलें भारतीय चली आशिल्लें. तेन्नाच तें आशियायी सर्ती खातीर पात्र थारिल्लें. मात, आतां अचकीत ताका कुशीक दवरलां. ताचे फाटलें कारण दिवंक ना. हो वाद वाडचे पयलीं मंत्रालयान निवड चांचणेचे निश्कर्श आनी कात्याक कित्याक पंगडांत घेवंक ना, तें स्पश्ट करूंक फावो. 16 जाणांचो सेलिंग पंगड आसा. तातूंत 17 वें कात्या. ताका सोडून सगल्यांक घेतल्यांत. हेर 216 खेळगड्यांक भायर बसयल्यात, तातूंत पदक मेळिल्ले, बरी कामगिरी केल्ले आनी आशियायी सर्ती खातीर पात्र थारिल्लेय कांय खेळगडे आसात खंय. ताका लागून खेळां मळा वयल्या मानेस्तांनी निवड प्रक्रियेचेर दुबाव उक्तायला.
प्रसार माध्यमां कडेन उलयतना कात्यान, आपले नांव 25 आॅगस्ट मेरेन (जे दीस खेळगड्यांची निवड जाहीर जाली.) वळेरेंत आशिल्लें असो दावो केला. गणभेस आनी हेर सोपस्कारूय जाल्ले. मागीर अचकीत चक्रां उरफाटीं कशीं घुंवलीं, कोणे घुंवडायलीं, अशे प्रस्न उफेंतात. हाचे आदीं तें आशियायी सर्तींत खेळ्ळां. ही ताची दुसरी सर्त आसपाची. सेलिंग हो तसो खर्चीक खेळ. ताका भरपूर मेहनत लागता. जीव मुठींत घेवन तो खेळचो पडटा. कात्याच्या म्हणण्या प्रमाण, ताणें घरच्यांच्या घामा- कश्टाचो पयसो वापरून ह्या खेळा खातीर इतलीं वर्सां तयारी केली. आतांय करी. निवड जावंक नाशिल्ल्यान तो पयसो उदकांत गेलाच, पूण ताचेच वांगडा मोल करूंक जायना असो वेळ फुकट गेला. ताची उमेद ना जाल्या ती वेगळी. हाचे फाटलें कारण निवड समितीन बेगोबेग दिल्यार बरें. कारण एका तरणाट्या खेळगड्याच्या करियराचेर ताचो परिणाम जावं येता.
राष्ट्रीय, आंतरराष्ट्रीय पांवड्या वयल्या सर्तींनीच न्हय, तर राज्य, जिल्हो पांवड्या वयले खेळां पंगड वेंचतना पार्शिलीटी ही जाताच. कोणे मागीर कितेंय सांगूं. क्रिकेट, फुटबाॅल आनी हेर खेळ खेळपी नव्या खेळगड्यांक, आतां पिरायेची पन्नाशी हुपिल्ल्या खेळगड्यांक, तांच्या पालकांक हाचो अणभव आयला आसतलोच. खेळांच्या संघटणां वयले कांय जाळवणदारूय धूर्त आसतात. ते आपले दोन मनीस तरी भितर घुसडटात. मागीर तांची कामगिरी बरी जावंक नाशिल्ल्यान ते भायर पडटात, ते सोडात. निवड प्रक्रिये विशीं दुबाव, वाद पसून जाल्यात. कांय समित्यो वयल्यान चेपण आयलें काय दिमी मारतात. हे प्रकार इतले खर आसात की फाल्यां हे भालो मोखपी खेळगडो नीरज चोप्राक पसून पंगडांतल्यान भायर मारीत!!
कात्या कुएल्होक नेमकें कित्या खातीर पंगडांत घेवंक ना, तें कोणाकूच खबर ना. सगल्यांनी अदमास मात उक्तायल्यात. राष्ट्र्रीय याॅटिंग असोसिएशन म्हणटा, पात्र जावपा खातीर सरकारान थारायिल्ले निकश ताणें पूर्ण करूंक नासतले. ताका कित्याक घेवंक ना, तें आमकां सरकारान कळोवंक ना. हालींच जाल्ले संवसारीक सेलिंग सर्तींत कात्यान एके शर्यतींत सुरवातूच करूंक ना, तर तीन शर्यती पुराय करूंक ना. आशियायी सर्ती खातीर आंतरराष्ट्रीय क्रमांक मेळपाक आंतरराष्ट्रीय सर्तींनी वांटो घेवचो पडटा. ताणें फावो तितल्यो आंतरराष्ट्रीय शर्यती करूंक नात, अशेंय असोसिएशनाक दिसता. सेलिंग शर्यतींत एकूच खेळगडो आसल्यार पसून शर्यतीचो वेगळो गट तयार करतात. हो नेम बदलचो अशेंय कांय जाणांक दिसता. एकलोच खेळगडो सहज जिखपाक शकता. पूण, बायलां खेळगड्यांक उर्बा दिवपाक हो नेम केला, अशें असोसिएशनाचें मत. पूण खेळांत सर्त ही जावंक जाय. नाजाल्यार मजा कसली?
कात्या हें आपल्या खेळांत फिशाल आसा. विंडसर्फिंगांत, फाॅयलिंगांत तें पयल्या क्रमांकाचेर आसा. म्हणटकूच ताका भायर दवरचे नात, अशेंच सगल्यांक दिशिल्लें. आशियायी सर्तींत रुप्या पदक मेळिल्लें ईश्वरिया दानीश हें कात्या कुएल्हो वांगडा सर्त करतना दुसऱ्या क्रमांकाचेर आयिल्लें. पूण ताका घेतला आनी पात्र थारिल्ल्या कात्याक भायर दवरला, हाचे फाटलें गणीत कळना. युवा वेव्हार आनी खेळां मंत्रालयाकूच घडये तें चड बरें खबर आसतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
