भांगरभूंय | प्रतिनिधी
म्हापशें, प्रतिनिधी ः निल्ला (नेरुल)- बार्देशांतल्या कोको बीचाचेर अनवळख्यांनी लायिल्ल्या उज्यांत पांच फायबर बोटी आनी एक दुकान लासून सुमार 30 लाख रुपयांचें लुकसाण जालें. ह्यो बोटी नुस्तेंमारी आनी उदकांतल्या खेळां खातीर वापरताले. हे संबंदी अनवळख्याचेर पर्वरी पुलिसांनी गुन्यांव नोंद केलां.
शुक्रारा रातच्या सुमार 8 वरांचेर ही घडणूक घडली. घडणुकेची म्हायती मेळटाच बोटीच्या धनयांनी उजो पालोवपाचो यत्न केलो. पूण उजो लागिल्ल्यो पांचूय बोटी फायबरच्यो आशिल्ल्यान उजो रोखडोच पातळ्ळो.
उपरांत उजो पालोवपी दळाक म्हायती दिली. पिळर्ण उजो पालोवपी दळाच्या कर्मचाऱ्यांनी पर्वरी उजो पालोवपी दळाच्या मजतीन रातीं उसरां उजो नियंत्रणांत हाडून तो पालयलो. तो मेरेन पांचूय बोटी आनी लागसारचें एक दुकान उज्यांत लाशिल्लें.
पिळर्ण उजो पालोवपी दळाचे उपअधिकारी सनी फायदे, विशाल पाटील, प्रीतेश महालदार, भावेश शिरोडकार, स्वप्नील नायक, विदेश म्हापसेकार आनी हेर जवानांनी पर्वरी उजो पालोवपी दळाच्या मजतीन उजो पालयलो.
मजगतीं, घडणुकीच्या कांय मिण्टां आदीं ते सुवाते लागीं हातांत पेट्रोल घेवन वचपी मनशाक कांय जाणांनी पळयल्ले. ते खातीर तांणेच ह्या बोटांक उजो लायलो आसूं येता असो दुबाव घेवन पर्वरी पुलिशेंत कागाळ केल्या. हे कागाळीचेर आदारून पुलिसांनी चवकशी सुरू केल्या.
मजगतीं, आमदार केदार नायक हांणी लुकसाण जाल्ल्या बोट धनयांक मेळून स्वता दरेकीं 50 हजार रुपया तशेंच मुख्यमंत्री आनी ग्रामपंचायती कडल्यान अर्थीक मजत दिवपाचे आश्वासन दिलें. तशेंच हे घडणुकेची योग्य आनी पुराय तपास करपाची सुचोवणी पुलिसांक दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
