भांगरभूंय | प्रतिनिधी
विद्यार्थी मारपेट प्रकरण
भांगरभूंय । प्रतिनिधी
पणजी : कामुर्ले विद्यार्थी मारपेट प्रकरणांत निलंबीत जाल्ल्यो शिक्षिका सोमारा शिक्षण संचालकां कडेन आपली बाजू मांडटल्यो. तांची बाजू आयकून घेतले उपरांत शिक्षण खातें निलंबनाचे कार्यवाये विशीं निर्णय घेतलें. कायदेशीर सोपस्कारा प्रमाण कारवाय करचे पयलीं शिक्षकांची बाजू आयकून घेवची पडटा.
चवथी पयली कामुर्लेचे मुळावे शाळेंत दोन शिक्षिकांनी विद्यार्थ्याक मारपेट करपाची घडणूक घडली. पुलिसांनी दोनूय शिक्षिकांक अटक करून रिमांड घेतलो. आतां तांची जामिनाचेर सुटका जाल्या. पुलिसां कडल्यान चवकशी चालू आसतना शाळा वेवस्थापनान चवकशी करून दोनूय शिक्षिकांचें सेवेंतल्यान निलंबन केलें. वेवस्थापनान शिक्षण खात्याक अहवाल सादर केला. शिक्षण संचालकांनी दोनूय शिक्षिकांक बाजू मांडपा खातीर नोटिसो जारी केल्यात. सैमीक न्याया प्रमाण कारवाय करचे पयलीं बाजू आयकून घेवची पडटा. बाजू आयकून घेतले उपरांत शिक्षण खातें कायद्या प्रमाण कारवाय करतलें, अशी म्हायती शिक्षण संचालक शैलेश झिंगडे हांणी दिली.
हाचे पयलीं शिक्षिके कडल्यान विद्यार्थ्याक मारपेट जावपाचें प्रकरण जाल्लें. डिसेंबर 2023 त न्यायालयान शिक्षिकेची आरोपांतल्यान सुटका केल्ली. विद्यार्थ्यांक शिस्त लावपा खातीर शिक्षकाक कांय प्रमाणांत विद्यार्थ्याक ख्यास्त करचीच पडटा, अशें निरिक्षण न्यायालयान नोंद केल्लें. हे फाटभुंयेर पुलीस तशेंच शिक्षण खातें विद्यार्थी मारपेट प्रकरणची चवकशी पुराय जतनाय घेवन करता. विद्यार्थ्याक जाल्लो मारपेट हो गंभीर प्रकार आसा. संबंदीत शिक्षिकांचेर खर कारवाय जातली, अशें मुख्यमंत्री डॉ. प्रमोद सावंत हांणी हे आदींच स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
