भांगरभूंय | प्रतिनिधी
सोमारा जोड बसका, उपजिल्होधिकाऱ्याचो काम बंद करपचो आदेश
पणजी: नेरूल पंचायत घरा कुशीक उबारिल्लो मोबायल टॉवर ताकतिकेन काडचो हे मागणे खातीर तिडकल्ल्या थळाव्या लोकांनी रास्ता रोको आंदोलन केलें. हाका लागून गांवांत तणावाची स्थिती निर्माण जाली. आंदोलकांचो पवित्रो पळोवन सरकारान नमतें घेवन उपजिल्होधिकाऱ्यान टॉवराचें काम बंद करपाचो आदेश दिलो. तशेंच सोमारा 1 ऑगस्टाक घडणूक थळार ग्रामस्थांची आनी संबंदितांची जोड बसका घेवपाचें आस्वासन दिलें. उपरांत सांजवेळा उसरां हें आंदोलन तात्पुरतें स्थगीत करपाचो निर्णय ग्रामस्थांनी घेतलो.
लोकांची दिशाभूल करून गांवांत उबारिल्ल्या टॉवरा वयल्यान कांय दिसां सावन ग्रामस्थांनी आंदोलनाचो मार्ग स्विकारिल्लो. बिरेस्तारा सकाळीं नेरूल पुलार ग्रामस्थांनी ठाण मांडून आनी रास्ता रोको आंदोलन सुरू केल्लें. जो मेरेन मोबायल टॉवर कुशीक काडिनात, तो मेरेन आंदोलन फाटीं घेवचे नात असो निश्चेव ग्रामस्थांनी केल्लो.
उपजिल्होधिकारी स्नेहा गीत्ते, पुलीस उपअधिक्षक विश्वेश कर्पे, जोड मामलेदार राजाराम परब, पुलीस निरिक्षक अनंत गांवकार हांणी ह्या आंदोलकांची समजूत काडपाचो यत्न केलो. पूण तांकां तातूंत येस आयलें ना. ह्या वेळार आमदार केदार नायक हाजीर आशिल्ले.
दनपारां उपजिल्होधिकारी स्नेहा गीत्ते हांणी आंदोलक बायलांच्या शिश्टमंडळाक आपले कचेरेंत आपयलें. ह्या शिश्टमंडळाक उपजिल्होधिकाऱ्यान खूब वेळ कचेरेंत बसोवन दवरलें. उपरांत तांकां पंचायत वेंचणूक सोंपले उपरांत टॉवरा विशीं निर्णय घेवंक मेळटलो अशें लेखी आस्वासन दिवपाचो यत्न केलो. ताका ह्या शिश्टमंडळान विरोध करून परतून आंदोलनाचे सुवातेर ठाण मांडलें.
आंदोलक ग्रामस्थ खंयचेच परिस्थितींत आयकून घेवपाक तयार नाशिल्ल्याचें पळोवन निमाणें प्रशासनान नमतें घेतलें. सांजवेळा उसरां उपजिल्होधिकारी गीत्ते हांणी टॉवराचें बांदकाम करपाचो आदेश जारी केलो. हें आदेशपत्र तांणी ग्रामस्थांक सादर केलें. तशेंच येता त्या 1 ऑगस्टाक दनपारां 3 वरांचेर संबंदीत अधिकारी आनी ग्रामस्थांची जोड बसका घेवपाचें आस्वासन दिलें. ह्या आस्वासना उपरांत ग्रामस्थांनी आंदोलन स्थगीत दवरपाचो निर्णय घेतलो आनी रस्तो मेकळो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
