भांगरभूंय | प्रतिनिधी
भांगरभूंय । प्रतिनिधी
म्हापशें: भाटीवाडो निर्ला घरगुती गॅस गळटीक लागून उजो पेटलो आनी जया जीवन शिरोडकार (50) आनी दिलेश जीवन शिरोडकार (21) आवय- पूत जखमी जाली. तांचेर गोमॅकाँत उपचार चालू आसात. गॅस गळटीच्या स्फोटाक लागून घराच्या जनेलाचे फुटिल्ले हारशे 15 मिटर मेरेन पयस उसळ्ळे.
ही घडणूक आयतारा सकाळीं 7.45 वरांच्या सुमाराक घडली. शिरोडकार हांचें हें घर एके कुडीचेंच आसा. आवय- पूत घरांत न्हिदिल्लीं. सकाळीं जय उठली आनी ती च्या करचे खातीर गॅस पेटोवपाक गेली. लायटर पेटयताच उज्याचो लोळ उठलो आनी ती जमनीर पडली. दिलेश लेगीत ह्या लोळाक लागून खाटी वयल्यान खाला पडलो. दोगूय ह्या उज्यांत लासलीं.
उज्याचो लोळ उठ्ठाच जनालाचें हारशे फुटून पयस मेरेन उसळ्ळे. दारूय मोडून पडलें. घराच्या पांख्या वयले पत्रे लेगीत बागावले.
शिरोडकार हांच्या घरांतल्यान व्हड आवाज येताच शेजारच्या लोकांनी घडणुकेचे सुवातेर धांव घेतली. उज्यान लाशिल्ले आनी जखमी अवस्थेंत पडिल्ल्या आवय- पुताक तांणी कांदोळीच्या भलायकी केंद्रांत दाखल केले. थंयच्यान तांकां गोमॅकाँत धाडलीं. जया 30 टक्के जाल्यार दिलेश 20 टक्के ह्या उज्यांत लासला.
घडणुकेची म्हायती मेळटाच पिळर्ण उजो पालोवपी दळाचे जवान तशेंच पर्वरी पुलिसांनी घडणुकेचे सुवातेर धांव घेतली. ह्या वेळार घरांतलें सामान जळटालें. दलाचे हवालदार नरेंद्र शेट्ये, परेश गांवस, भावेश शिरोडकार, जितेंद्र बली आनी दत्तप्रसाद सिनारी ह्या जवानांनी उजो पालयलो. उजो पालोवपी दळाचे उपअधिकारी राजेंद्र हळदणकार आनी पिळर्णाचे अधिकारी दामोदर पेडणेंकार हांणी घडणुकेचे सुवातेर भेट दिवन पळोवणी केली.
5 लाखांचें लुकसाण जाल्ल्याचो अदमास
ह्या उज्यांत शिरोडकार कुटुंबियांच्या घरांतलें सगळें सामान लासून गेलां. तशेंच घराचेंय व्हड प्रमाणांत लुकसाण जालां. सुमार 5 ते 10 लाखांचें लुकसाण हे दुर्घटणेंत जाल्ल्याचो अदमास आसा. जखमी जया आनी दिलेशाची जबानी घेतले उपरांत लुकसाणेचो आंकडो स्पश्ट जातलो. तीन म्हयन्यां आदीं दिलेशाच्या बापायक मरण आयिल्लें. ते उपरांत आवय- पूत दोगांच घरांत रावतालीं. दिलेश हो मॅकानिकल इंजिनियरिंगांत शिक्षण घेता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
