भांगरभूंय | प्रतिनिधी
पणजी: तिखाजण मयां विजयानंद हायस्कुलांत चवथ परबेच्या निर्माल्या पसून सारें तयार करपाचो एक आगळो उपक्रम हालींच राबयलो. चवथी वेळार श्रीगणपतीक ओंपिल्लीं फुलां एकठांय दवरपाची सुचोवणी शाळेची मुख्याध्यापिका सुमन गांवकार हांणी चवथीची सुटी सुरू जावचे पयलींच भुरग्यांक आनी शिक्षकांक दिल्ली. सुटये उपरांत सगल्या विद्यार्थ्यांनी आनी शिक्षकांनी एकठांय केल्लें निर्माल्य हायस्कुलांत हाडलें आनी हो उपक्रम राबयलो.
हे कार्यावळीक साळगांवच्या गोंय राज्य विज्ञान आनी तंत्रज्ञान परिशदेचें वैज्ञानीक विकास अधिकारी केशव नायक रिसोर्स व्यक्ती म्हूण हाजीर आशिल्ले. विद्यार्थ्यांनी आनी शिक्षकांनी एकठांय केल्लें निर्माल्य नाल्लाचो भुसो, धंय, माती एकठांय करून एका प्लास्टीक आयदनांत दवरलें.
हे प्रक्रियेंतल्यान तीन म्हयन्या उपरांत सारें निर्माण जातलें. ह्या वेळार केशव नायक हांणी सारें तयार करपाचे प्रक्रिये विशीं विस्तारान विद्यार्थ्यांक म्हायती दिली. ह्या वेळार विज्ञान विशयाचेर शाळेंत वेगळेवेगळे उपक्रम आयोजीत करपा खातीर गोंय राज्य विज्ञान आनी तंत्रज्ञान परिशदेन आंखिल्ल्या वेगळ्यावेगळ्या येवजण्यांची म्हायती दिली.
हे कार्यावळीचो मुखेल उद्देश उदकाचें जावपी प्रदुशण नियंत्रणांत दवरपाचो आशिल्लो. चवथी वेळार निर्माल्या बरोबर रंग आनी हेर ‘नॉन बायोडिग्रेडेबल’ वस्तू उदकांत सोडटात. ताका लागून उदक प्रदुशीत जाता. तें आडावपाचो हो एक ल्हानसो यत्न शाळे वतीन केल्लो अशी म्हायती मुख्याध्यापिका सुमन गांवकार हांणी दिली.
हे कार्यावळीक शाळेच्या वेवस्थापनान लेखीत तोखणाय केली. ही कार्यावळ मुख्याध्यापिका सुमन गांवकार, शिक्षक शिवराम ठाणेकार आनी शिक्षिका शीना वायंगणकार हांच्या मार्गदर्शना खाला जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
