भांगरभूंय | प्रतिनिधी
न्यूयाॅर्क, खबरां संस्था : एकावनाव्या आंतरराष्ट्रीय एमी पुरस्कारांची घोशणा जाली. निर्माती-दिग्दर्शक एकता कपुराक दिग्दर्शनाचो पुरस्कार मेळ्ळो. ह्या पुरस्कारान भारतीयाक पयलेच फावटी भोवमानीत केला. कॉमेडियन वीर दास हांणी कॉमेडी खातीर आंतरराष्ट्रीय एमी अवॉर्ड जिंकलो. ‘दिल्ली क्रायम २’ हे माळे खातीर शेफाली शाह हिका सर्वोत्कृश्ठ अभिनेत्रीचे श्रेणीत नामांकन मेळिल्लें, पूण तिका हो पुरस्कार मेळूंक ना. तिच्या जाग्यार ’ला कैडा’ हे मॅक्सिकन माळे खातीर अभिनेत्री कार्ला सौझा हिका पुरस्कार मेळ्ळो.
हो सुवाळो न्यूयॉर्कांत जालो. जातूंत २० देशांतल्या वट्ट ५६ लोकांक १४ श्रेणींत नामांकन मेळिल्लें.
भारतीय दुरचित्रवाणी उद्देगांतल्या योगदाना विशीं आनी सह-संस्थापक म्हणून बालाजी टेलिफिल्म्स प्रॉडक्शन हावजची स्थापना केल्ले खातीर एकता कपूर हाका हो पुरस्कार फावो जाला.
ह्या जैता विशीं एकता कपुरान इंस्टाग्रामाचेर एक व्हिडिओ पोस्ट केलो आनी कॅपशनांत बरयलें, ‘‘भारत, हांव तुमचो एमी अवॉर्ड घरा घेवन येतां.’’
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
