भांगरभूंय | प्रतिनिधी
अाई कुठे काय करते? ही स्टार प्रवाहा वयली मराठी टी.व्ही. माळ एके बळिश्ट आवयची काणी. जिणेंत फुडें वतना आडमेळीं खूब येतात, भिरांतय दिसता, पूण रडत, चिंतत बसूं नाकात. खीणभर विसव घेयात, निर्भया जावन अत्याचारा आड झुजात हो संदेश दिवपी. महाराष्ट्रांतली शक्तीमान अस्तुरी मृणाल गोरे, विद्या बाळ, निलम गोऱ्हे, शोभना रानडे हांणी तेंच सांगलें. हे स्त्रीशक्तीक मेळपाची संद आमकां साडेतीन दसकांतले पत्रकारितेंत मेळ्ळी. पुरूशसत्ताका कडल्यान मातृसत्ताका कडेन वचपाचें झुजूय ह्याच काळांतलें. सुरवेक आमचे वांगडा पत्रकारितेंतली स्त्रीशक्तीय आयली ना मागीर ते कशे येतले? आमी बरोवंक लागतकीच आपसूक तीच न्हय तेय आयले. आमी व्यक्त जातात तेन्ना ते वांगडा येतात हें पळोवन बरें दिसता, पूण सदांच तांकां स्त्रीशक्ती बराबर रावपाक कशें भावतलें? 33 टक्के अस्तुरी राखीवतेचेर ती उलयता, बरयता तें पळोवन तो उलोवपाक, बरोवपाक लागला. घुंवडावन, घुंवडावन तेंच सांगतना निमाणे अस्तुरे तूं सांबाळून राव, तुका 33 टक्के राखीवतेन राजकारणांत येवचें पडटलें आमकां सांगाता घेवन. होच निरोप आडवाटेन तुमी दितात, नो प्रॉब्लेम. आमीय तयार आसात 2023 खातीर हें गोंयचे अस्तुरेनूय सांगचें पडटलें. अस्तुरेक अर्थीक, राजकी नदरेन सक्षम करपाक जायच, पूण तें वेंचून येतकीच कित्याक जावचें न्हय? लोकसभा 2024 त गोंयच्यान एक अस्तुरी लोकसभेंत धाडपाक सगल्यांचो एकवट म्हत्वाचो. जे पद्धतीन खासदार सदानंद तानावडे राज्यसभेर सगल्यांचे मान्यतायेन पावले तीच पद्धत एके अस्तुरेक लोकसभेर धाडपाक गोंय आपणायत?
ती कित्याक वचूंक जाय लोकसभेंत? अन्याय, अत्याचारा आड उतरांनी झगडपाकच न्हय जाल्यार म्हादय, पश्चीम घांट वाटावपाक. उतरां उणीं जायत जाल्यार कागदपत्रांय तिचे कडेन आसतलीं. पावस, वाऱ्याचीं गणितांय तिका खबर आसात, मोबायलाचेर सांबाळात, घरा भायर सरूंक नाकात अशे रकादय मेळटात. ए.आय. केन्नाच आयलां, चॅटबोटय आयल्यात, सादूर रावन उपेग करात. नवें तंत्रगिन्यान आपणावपाक तरणाटे मुखार, तरणाट्यां कडल्यान सिनियर्सांनी शिकचें पूण जाय तितलेंच. तरणाट्यांक उच्च शिक्षण घेवपाक उमेद दितना मनीसपण आनी हातांत पुस्तक घेवंक शिकयात.
गोंयांत दोतोर, इंजिनियर, सी ए, वेवस्थापन, उद्येग, वेवसाय, वखदांशास्त्रांत, सरकारी अधिकारी स्त्रीशक्ती आसा. कोंकणी भाशा मंडळाचें अध्यक्ष अन्वेशा सिंगबाळ एक पत्रकार, पुरवणी संपादपीय. कोंकणी भवना इतलीच मायभास सगल्यांनी उलोवची, बरोवची हे खातीर तें वावुरतात. भाशा मंडळाच्या शाळां कडेन तांकां लक्ष दवरचें पडटा. तांकां बळ दिवपी युवाशक्ती, मंडळाची उपाध्यक्ष रत्नमाला दिवकार (गोवा फॉरवर्डाचे प्रशांत नायक हांची घरकान्न) राजकारणांत येत? तांकां मार्गदर्शन करपी कोंकणीचे म्हालगडे पयलींचे आमदार अॅड. उदय भेंब्रे, तांची घरकान्न किशोरीताई भेंब्रे, ज्ञानपीठकार दामोदर मावजो, तांची घरकान्न शैला मावजो, मीना काकोडकार, माया खरंगटे आनी हेरांक सलाम. पावसाचो रॅड अलर्ट आसतनाय कोंकणी भाशा मंडळाचो 61 वो वर्धापन दीस सुवाळो जालो तांचेच खातीर.
लोकसभा वेंचणुको लागीं येतना अन्नपूर्णा, स्वयंपूर्णा, लक्ष्मी, लाडली दारांत पावतल्यो. संद कित्याक सोडप? तांकां वंदन करतना सरस्वती, विद्या जाय, प्रसंगार दुर्गाय जावपाक विसरूं नाकात. 33 टक्क्यांचेर आपल्या मनांतले उमाळे बरोवन दिसाळ्यांनी धाडल्यार छापचे आदीं मातशी नदर मारात. दिसाळ्यांनी, माध्यमांनी स्त्रीशक्ती सगल्या विभागांनी आसा. अन्याय, अत्याचारय माध्यमांनी, शाळा, म्हाविद्यालयांनी कालय जाले, आयजय जातात. अत्याचारा आड ती झुजत फुडें गेली ताच्या बळग्यान. हे फुडेंय तशेंच जावचें अशें न्हय, तिका आपलें अस्तित्व दाखोवन दिवचेंच पडटलें. संघटणेची शक्त फाटल्यान नासतनाय ती फुडें सरता ही नारीशक्तीची प्रतिमा दिसत व्हय 2024 लोकसभा वेंचणुकांनी? ती उच्च शिक्षण घेवनय नोकरी वेवसाय आनी समाजा बराबर आसत जाल्यार एकचार तिचे खातीर कित्याक दाखोवचो न्हय? सोदत काय भारत सरकार तशी नारीशक्ती? सोदल्यार पायलेक पन्नास दिसत पूण एकवट, कोणाचे वाटेन तें सोदचें पडटलें. लोकसभा, राज्यसभा, विधानसभे खातीर 33 टक्के बायलां राखीवतेची तिची, ताची मानसीकता तयार करचीच पडटली.
ती कित्याक येता पिडापीड करपाक? हीं उतरां पयस दवरात. ती येता तिचे खातीर, तिका घटमूट करपाक सक्षमीकरणाच्या फुडल्या पांवड्यार आयजच धाडचें हें मागपाक. निर्भया चालीक लावपाक, उद्येजक जावपाक मुळावें भांडवल तिचे कडेन आसतलें. गरज आसा तिका राखण मेळपाची, सगल्यां मळांनी राकेस आसल्यार ती दुर्गामाता, भारतमाता जातलीच. रातपाळी आसल्यार बशींची, लेडिज ओन्ली, लेडिज स्पेशलची तजवीज जाल्या. स्त्रीशक्तीक समाजीक सुरक्षा दिवपी आदले मुख्यमंत्री मनोहर पर्रीकार हांकां सलाम. तांणीच बायलां सक्षमीकरणाची बुन्याद गोंयांत घाली, आतां लायात चालीक. दियात तिका हक्क गोंयांतल्यान पयलीं, धाडुया तिका एके सुवातेर उमेदवारी दिवन. यूग येता तिचें म्हणून बेजार कित्याक? येवकार दिला, कळाव कित्याक? पंचायत, जिल्लो पंचायत, नगरपालिकेंतल्यान वेंचून येवपी जिखपाची तांक आशिल्ल्यो हजार आसतल्यो. पयल्यो जिल्लो पंचायत वांगडी अमोल मोरजकार आयज आमचे मदीं ना, नेली रॉड्रिग्ज आसात. करुया तिका, लोकशायेक नमन. फकत ताळ्यो, फुलांनी न्हय, शारदादेवीची वंदना करून.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
