भांगरभूंय | प्रतिनिधी
सुदीन ढवळीकार: फर्मागुडयेर कॅन्सर रोग शिबिराचें उक्तावण
फोंडें: धैर्य आनी निर्धार केल्यार अशक्य गजाली सहज शक्य जातात. कॅन्सर ह्या रोगाचेर नियंत्रण दवरपा खातीर पयलीच तपासणी करून घेवपाची गरज आसा. बायलां मदीं कॅन्सर रोगाचें प्रमाण वाडलां. ताका लागून गांवांगांवांनी कॅन्सर तपासणी शिबिरां आयोजीत करपाची गरज आशिल्ल्याचें वीज मंत्री सुदीन ढवळीकार हांणी सांगलें.
फर्मागुडयेर आयएमए चेरीटेबल ट्रस्ट, माधवराव ढवळीकर ट्रस्ट आनी युवराज सिंग फावंडेशना वतीन आयोजीत केल्ल्या कॅन्सर रोग शिबिराचें उक्तावण वीज मंत्री सुदीन ढवळीकार हांचे हस्तुकीं जालें. ह्या वेळार डॉ. संतोष उसगांवकार, डॉ. पौर्णिमा उसगांवकार, फोंडें उपजिल्हो हॉस्पिटलाचे अधीक्षक डॉ. जयश्री मडकयकार, भलायकी अधिकारी डॉ. स्मिता पार्सेकार, मिथील ढवळीकार, जिल्हो पंचायत वांगडी गणपत नायक, सरपंच सुखानंद कुरपासकार, मनुजा नायक आनी हेर मानेस्त हाजीर आशिल्ले.
ह्या शिबिरांत मडकय मतदार संघांतल्या सगळ्या बायलांनी तपासणी केल्या उपरांत हेर मतदार संघांतल्या बायलांची तपासणी केली. ह्या संदीचो सगळ्या बायलांनी लाव घेवपाची गरज आशिल्ल्याचें मंत्री ढवळीकार हांणी फुडें सांगलें.
मंत्री सुदीन ढवळीकार हांणी महिला दिसाचे कार्यावळींत दिल्लें आस्वासन पुराय केलां. ह्या शिबिराचो लाव सगळ्या बायलांनी घेवन स्वता वांगडा आपल्या कुटुंबाची जतनाय घेवप गरजेचें अशें डॉ. जयश्री मडकयकार हांणी सांगलें.
जिल्हो पंचायत वांगडी गणपत नायक हांणी कॅन्सराचेर नियंत्रण दवरपा खातीर हें शिबीर उपेगी थारतलें अशें सांगलें.
ह्या वेळार सरपंच मनुजा नायक आनी डॉ. पौर्णिमा उसगांवकार हांणी आपलें मनोगत उक्तायलें. डॉ संतोष उसगांवकार हांणी येवकार दिलो आनी डॉ. दिलीप केरकार हांणी उपकार मानले. कार्यावळीचें सुत्रसंचालन गोकुळदास गावडे हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
