भांगरभूंय | प्रतिनिधी
भांगरभूंय । प्रतिनिधी
वाळपयः सद्या भरपूर उत्पादन मेळचें हें खातीर जमनीत व्हडा प्रमाणांत रासायनीक साऱ्याचो वापर जावपाक लागला. ताका लागून जमनीचो कस उणो जाता. जमनीचें वेसस्थापन सैमीक पद्दतीन करप गरजेचें आसा. तातूंतल्यान बरे तरेच्या फळाचें उत्पादन जाता. तीं खाल्यार भलायकेचेर कसलोच परिणाम जायना. मात रासायनीक सारें वापरून केल्ली कृशी उत्पादनाचो कुडीचेर प्रतिकूल परिणाम जाता. ताका लागून निरोगी फुडारा खातीर सैमीक शेती व्होच पर्याय आसा अशें ज्येश्ठ संशोधक डॉ एम बोमय्यास्वामी हाणे सांगलें.
एला- पोरणे गोंय हांगच्या भारतीय कृशी अनुसंधासन केंद्र आनी सीसीएआर हांच्या जोड पालवान आयोजीत केल्ल्या सैमीक कृशी पद्दत, प्रशिक्षण आनी प्रात्यक्षिकां कार्यावळींत ते मार्गदर्शन करताले. भिरोडें पंचायत वाठारांत अडवय हांगा ही कार्यावळ आयोजीत केल्ली. ह्या वेळार सरपंच उदयसिंग राणे हाजीर आशिल्ले. सत्तरी तालुक्यांत सद्या सैमीक शेती पद्दतीक सुरवात जाल्या. सेंद्रीय साऱ्याचो वापर करून तरेकवार उत्पादना घेवपाक जातात. शेतकार आतां जागे जाल्यात. फुडाराचो तांका हुस्को आसा. ताका लागून सैमीक साऱ्याचो वापर करून ते आतां उत्पादनां घेवपाक लागल्यात अशें डॉ बोमय्यास्वामी हांणी आपल्या उलोवपांत सांगलें. सैमीक पद्दतीत शेतां कशी करप हाची तांणी सविस्तर म्हायती दिली.
सैमीक शेतां खातीर बिजामृत, घनजीवामृत, जीवामृत आनी आच्छादनाचो वापर करपा संबंदी तांणी शेतकारां कडेन चर्चा केली. जमनीचो कस आनी सुपिकताय, सेंद्रीय कार्बनाचें प्रमाण आनी मातीचे सुक्ष्मजीव जैव पदार्थ ताका लागून सुदारतात अशें ताणे सांगले. साऱें आनी कीड नाशकांचो चड वापर केल्यार पर्यावरण आनी मातीचो कस आनी पोत इबाडटा ताका लागून तें वापरतना शेतकारांनी विचार करपाक जाय अशें उदयसिंग राणे कार्यावळीच्या उक्तावणा वेळार सांगलें. सैमीक शेतां व्हो पारंपरीक शेत पद्दतीचो एक वेवहार्य पर्याय आसा. ताचो प्रत्यक्ष वा अप्रत्यक्ष शाश्वत कृशी उत्पादनाचेर परिणाम जाता अशें एसएमएसाचे वनस्पत संरक्षण विभागाच्या एच आर प्रभू हाणे सांगलें.
कार्यावळींत कृशी शास्त्रज्ञ राहुल कुलकर्णी हाणे जीवामृत आनी बीजामृत तयारीचीं प्रात्यक्षिकां दाखयलीं. कार्यावळींत वांटेकार जाल्ल्यांक मुळो, पालक, वायंगी, कोथमीर हाची बियाणाचें वांटप केले. आयसीएआर- सीसीएआरआयचो संचालक डॉ प्रवीण कुमार हाचे देखरेखी खाला ही कार्यावळ जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
