भांगरभूंय | प्रतिनिधी
सिद्धी पोरोब : दिवचले सायक्लोथॉन सर्तीक उत्स्फूर्त प्रतिसाद
भांगरभूंय । प्रतिनिधी
दिवचल : आयुर्वेद आनी योग ही भारतीय शास्त्रां मनशाचे निरोगी जिणे खातीर खूब फायद्याचीं आसात. आपूण फाटल्या कितल्याश्याच वर्सां सावन आयुर्वेद जिणेशैली जगता, तशेंच गरज लागता तेन्ना आयुर्वेद चिकित्सा घेवपाक प्राधान्य दितां. बायलांनी सद्दां व्यायाम करप गरजेचें आसा. सायकलींग, चलप, पेंवप, गिर्यारोहण अश्या विवीध उपक्रमांनी बायलांनी वांटो घेवचो आनी निरोगी रावचे खातीर आयुर्वेद जिणेशैली आपणावची. पंचकर्म चिकित्सा तशें आयुर्वेद वैद्यांचें सेगीत मार्गदर्शन घेवचें, अशें सांखळेची नगराध्यक्ष सिद्धी प्रभू पोरोब हांणी सांगलें.
दीनदयाळ आयुर्वेद चिकित्सासय आनी पंचकर्म केंद्रान आंतरराष्ट्रीय महिला दिसा निमतान आयुर्वेद शास्त्राचो प्रचार आनी प्रसार तशेंच बायलांय व्यायाम करपाक उर्बा दिवचे खातीर 9 मार्चाक सायक्लोथॉन 2025 तशेंच हॅल्थ वॉकचें आयोजन केल्लें. ह्या वेळार पोरोब मुखेल सोयरी म्हूण उलयताली. तांचे वांगडा माचयेर दिवचलचे नगराध्यक्ष विजयकुमार नाटेकार आनी दीनदयाळ जनसेवा प्रतिश्ठानाचे अध्यक्ष वल्लभ साळकार मानाचे सोयरे म्हूण तशेंच दीनदयाळ पतसंस्थेचे उपाध्यक्ष कांता पाटणेकार, सीईओ सुभाष पाटणेकार, संचालक शिवाजी जल्मी, अर्जून माळगांवकार, श्याम मातोंडकार हाजीर आशिल्ले.
ह्या उपक्रमांत 10 ते 59 वर्सां पिराय गटांतल्या 50 बायलां आनी चलयांनी वांटो घेतिल्लो. 13 किलोमिटर सायकल चलोवपांत पालवी संकेत नायक पयलें, ऋतुजा मातोंडकार दुसरें, अनुश्री नायक तिसरें आयलें. 5 किलोमिटर सायकल चलोवपांत उर्वी आमोणकर पयलें, सौम्या कळणेकार दुसरें, आर्या सावंत तिसरें आयलें.
सिद्धी पोरोब हांणी लग्न जाल्ल्या बायलां खातीर 3 विशेश इनामां जाहीर केलीं. तातूंत गायत्री अभिजीत माणगांवकार पयलीं, मयुरा गांवकार दुसरी आनी संचिता गांवस तिसरी हांकां इनामां दिवन तांचो भोवमान केलो.
सुत्रसंचालन प्रांजल मराठे हांणी केलें. अरूण नायक हांणी प्रस्तावना केली आनी येवकार दिलो. प्रियंका पेडणेंकार हांणी वॉर्मअप सत्र घेतलें. वैद्य कृपा नायक हांणी बायलांचे भलायके खातीर आयुर्वेद ह्या विशयाचेर मार्गदर्शन केलें. वैद्य सृष्टी गवस हांणी उपकार मानले. वैद्य सृष्टी गवस हांच्या फुडारपणा खाला हो उपक्रम जालो. सुप्रिया सुतार, सिद्धी नायक, सुमेधा, सतीश नायक हांणी कार्यावळीचें नियोजन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
