भांगरभूंय | प्रतिनिधी
वाळपय: वाळपय पुलीस स्टेशनाचे निरिक्षक दिनेश गडेकार हांकां पुलीस कर्मचाऱ्यां वतीन निरोप दिलो. तेच प्रमाण वाळपय पुलीस स्टेशना वेले नवे निरिक्षक राहूल नायक हांकां येवकार दिलो.
पुलीस केंद्र स्टेशनार आयोजीत केल्ल्या सुवाळ्यांत उलयतना दिनेश गडेकार हांणी सांगलें, फाटल्या कांय म्हयन्यां सावन सत्तरी म्हालांत काम करतना एक वेगळेच तरेची खोस भोगली, समाधान जालें. ह्या वाठारांतले लोक सहकार्य करपी आसा. बरे तरेन तांणी आतां मेरेन पुलीस स्टेशनार सहकार्य केलें. हाका लागून फुडारांत वाळपय पुलीस स्टेशन नागरिकांच्या सहकार्याचें केंद्र थारचें अशी इत्सा तांणी उक्तायली.
नवे निरिक्षक राहूल नायक हांणी सांगलें, जे पद्दतीन गडेकार हांणी वाळपय पुलीस स्टेशनार आपली प्रतिमा निर्माण केल्या, तेच पद्दतीन काम करतलों अशें स्पश्ट केलें. दरेक नागरिकान बरे तरेचो न्याय आनी सुरक्षा प्रदान करपाचे नदरेंतल्यान सहकार्य करचें अशी विनंती तांणी केली. खंयच्या नागरिकाक कसलीच अडचण येवची ना, हे खातीर दरेकान जतनाय घेवची अशी नायक हांणी विनंती केली.
सत्तरी पत्रकार संघाचे अध्यक्ष उदय सावंत हांणी सांगलें, फाटल्या 28 वर्सां सावन वाळपय पुलीस स्टेशनार कार्यरत आशिल्ल्या दरेक निरिक्षकान समाजाक बरे तरेची सेवा दिल्या. येता त्या अडचणींक समर्थपणान तोंड दीत समाजाक कसलेच तरेची समस्या निर्माण जावची ना हाची विशेश जतनाय घेतल्या. हाका लागून फुडारांत राहूल नायक हांच्या रुपान बऱ्या कार्याची अपेक्षा ह्या वेळार तांणी उक्तायली.
दिनेश गडेकार हांणी थोड्याश्या काळा भितर एक प्रामाणीक आनी पारदर्शी समाजा कडेन नातें जोडपी अधिकारी म्हूण प्रतिमा निर्माण केली. फुडारांतूय तांणी पुलीस खात्यांत अशेच तरेची आदर्शवादी भुमिका वठोवची अशी विनंती सावंत हांणी केली.
पुलीस उपनिरिक्षक जाधव हांणी ह्या वेळार आपली प्रतिक्रिया उक्तायतना थोड्याशा काळांत गडेकार हांणी सगल्या कर्मचाऱ्यांक बरे तरेचें सहकार्य केलें. हाका लागून तांचे कार्य निश्चीतपणान दरेकाचे यादींत उरतले अशें म्हणलें.
ह्या वेळार पुलीस कर्मचाऱ्यांचे वतीन उपनिरिक्षक विराग पवार आनी जाधव हांचे हस्तुकीं दिनेश गडेकार हांकां भेटवस्तू भेटयल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
