भांगरभूंय | प्रतिनिधी
बदली जावनूय वचूंक नाशिल्ल्या पुलीस अधिकाऱ्यांची वळेरी दियात: अधिक्षकपणजीः फाटल्या कांय वर्सांत बदली जाल्ल्या आनी बदली जावनूय आदेशा प्रमाण हेर सुवातेर बदली जाल्ल्या पुलीस अधिकाऱ्यांची वळेरी घेवन ड्यूटी मास्तरांनी बिरेस्तारा सकाळीं 11 वरांचेर पणजेंतल्या प्रशासकीय खात्याक अहवाल दिवचो असो आदेश मुख्यालय अधिक्षक नेल्सन आल्बुकेर्क हांणी बिरेस्तारा जारी केला.
फाटल्या पांच वर्सांत सुमार 850 पुलीस अधिकाऱ्यांची बदली जाल्या. पूण बदलीचो आदेश जारी जाले उपरांत लेगीत कांय पुलीस अधिकारी त्याच सुवातेर काम करतात आनी कांय जाणांक निरिक्षकांनी सोडले नात अशें खात्याच्या लक्षांत आयलें. देखून कांय दिसां आदीं आल्बुकेर्क हांणी निरिक्षकांनी बदली करून सुटका केल्ल्या आनी अजूनय त्याच सुवातेर आशिल्ल्या आनी सोडून दिवंक नाशिल्ल्या सगळ्या पुलीस निरिक्षकांची वळेरी मागली. तशेंच अशा सगल्या पुलीस अधिकाऱ्यांक तांच्या बदली सुवातेर धाडपा खातीर 6 एप्रीलाची मुजत दिली. आतां आल्बुकेर्क हांणी ड्यूटी मास्तरांक बिरेस्तारा सकाळीं 11 वरांचेर पणजेच्या प्रशासकीय खात्यांत हाजीर रावपाक सांगलां.
——————-
जायत्या पुलीस स्टेशनांनी मनीसबळाचो उणाव
– बदली जावन लेगीत कांय पुलीस अधिकारी आपल्या नेमिल्ल्या सुवातेर वचनात, ताचो परिणाम जायत्या पुलीस स्टेशनांचेर जावपाक लागला. अशा घडणुकांक लागून कांय पुलीस स्टेशनांनी मनीसबळाचो उणाव जाणवपाक लागला.
– पुलीस चड काळ एकाच सुवातेर रावल्यार भ्रश्टाचाराक वाव मेळटा. देखून राज्य सरकार दर तीन वर्सांनी पुलीस अधिकाऱ्यांची हेर सुवातींनी बदली करपाचें धोरण चालीक लायता. तरी लेगीत कांय पुलीस अधिकारी अधिक्षकाच्या आदेशां कडेन पुरायपणान आडनदर करतात अशें दिसता. देखूनच अधिक्षकांनी आतां हो प्रस्न गंभीरतायेन घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
