भांगरभूंय | प्रतिनिधी
भांगरभूंय । प्रतिनिधी
फोंडेंः सातेरीमळ- निरंकाल वाठारांत रान दुकरांन बागायतींची नासधूस करपाक सुरवात केल्या. रानवटी जनावरां बागायतींत येवपाक लागल्ल्यान बागायतदारांक लुकसाण सोसचें पडटा. निरंकालच्या मुखेल रस्त्यार गवे लेगीत भोवतना दिसपाक लागल्यात. राना खात्यान ताचेर उपाय येवजण करची अशी लोकांची मागणी आसा.
सातेरीमळ हांगच्या सर्वोत्तम (नाना) वेळगेकार हाचे बागायतींत रान दुकरांनी माडाचे कवाथ मोडून वडयले तशेंच केळीं आनी हेर झाडां हुमटावन वडयलीं. चार व्हडले कवाथे मुळा सावन हुमटायल्यात. वेळगेकाराचे हाका लागून कांय हजार रुपयाचें लुकसाण जालां.
कांय दिसां पयलीं निरंकाल वाठारांत बिबट्यान लोकांनी पाळल्ल्या कुत्र्याक उबारून व्हेल्लं. ते उपरांत राना खात्याच्या कर्मचाऱ्यांनी पाळत दवोरल्ली. सद्या बिबट्याचो त्रास कमी जाला तरी गव्यांचो वाडपाक लागला. मुखेल रस्य्ताचेर ते दिसपाक लागल्यात. वाहन चालकांक तांचो चड त्रास जाता. दुचाकी चालकांक गव्या पसून चड धोको उप्रासला. अपघात जावचे पयलीं राना खात्यान सादूर जावंन उपाय येवजण करची अशी थळाव्या लोकांनी मागणी करपाक सुरवात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
