भांगरभूंय | प्रतिनिधी
फोंडें: गवळवाडो- निरंकाल वाठारांतल्या रुख्मिणी प्रभू हांच्या घरा मुखार बिरेस्तारा सांजे वेळार बिबटो दिशिल्ल्यान सगळ्यांकूच घाम सुटलो. चवथीच्या दिसांनी बिबट्यान परतून लोकवस्तींत प्रवेश केल्ल्यान लोकां मदीं भिरांत पातळ्ळ्या. म्हायती मेळटाच बिरेस्तारा सांजे वेळार रान खात्याच्या अधिकाऱ्यांनी घडणुकेचे सुवातेर येवन पळोवणी केली.
मेळिल्ले म्हायती प्रमाण बिरेस्तारा सांजेच्या 6 वरांच्या सुमाराक रुख्मिणी प्रभू हांच्या घरा मुखार बिबटो दिसलो. बिबट्याक घरा मुखार पळोवन प्रभू कुटुंबियांची भंयान गुळी जाली. मात कांय वेळान बिबट्यान रानाची वाट धरली. बिबटो राना वटेन गेले उपरांत प्रभू कुटुंबियांनी फोंडें रान खात्याच्या कार्यालयाक म्हायती दिली. रान खात्याच्या अधिकाऱ्यांनी प्रभू कुटुंबियांच्या घरा लागसार रातीं उसरां मेरेन पळोवणी केली. मात तांकां बिबटो दिसूंक ना. दोन म्हयन्यां आदीं गवळवाड्या वयल्या पास्कोल रॉड्रिगीस हांणी पोशिल्ल्या सुण्याक मारिल्लो. तशेंच एका पोशिल्ल्या सुण्याक जखमी केल्लो. त्या वेळार थळाव्या लोकांनी बिबट्याक धरपाची मागणी रान खात्या कडेन केल्ली. पूण अजून मेरेन रान खात्यान त्या बिबट्याक धरूंक नाशिल्ल्यान थळावे लोक बेजार आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
