भांगरभूंय | प्रतिनिधी
फोंडें पालिकेचे बसकेंत घेतलो निर्णय
फोंडें: फोंडें पालिका वाठारांतल्या हेडग्या गोरवांची वेवस्था करपा खातीर निरंकाल-बेतोड्यां कोंडवाडो बांदतले. पालिके कुशीच्या मैदानार माती घाल्ल्या कंत्राटदाराचेर दंडात्मक कारवाय, शारांत नवी पार्कींग सुवात आनी हेर विवीध म्हत्वपूर्ण थाराव फोंडें पालिकेचे काल (बुधवारा) जाल्ले बसकेंत घेतले.
नगराध्यक्ष रितेश नायक हांचे अध्यक्षताये खाला जाल्ले बसकेंत कृशी मंत्री रवी नायक, मुख्याधिकारी योगीराज गोसावी, उपनगराध्यक्ष अर्चना डांगी, नगरसेवक व्यंकटेश नायक, विश्वनाथ दळवी आनी हेर नगरसेवक हाजीर आशिल्ले.
फोंडें शारांत हेडग्या गोरवांक लागून लोकांक त्रास सोंसचो पडटा. ताका लागून पालिकेन हेडग्या गोरवांक धरून कोंडवाड्यांत दवरपाचो यत्न सुरू केला. कोंडवाडो बांदपा खातीर कंत्राटदाराची नेमणूक लेगीत केल्या. मंजुरी मेळ्ळे उपरांत रोखडीच कामाक सुरवात जातली. शारांतलीं हेडगीं गोरवां धरपा खातीर कामगार तशेंच वाहनांची लेगीत वेवस्था केल्ल्याचें नगराध्यक्ष रितेश नायक हांणी सांगलें.
फोंडें पालिकेच्या शेजरा आशिल्ल्या मैदानार एका कंत्राटदारान व्हड प्रमाणांत माती सांठोवन दवरल्या. हे खातीर कंत्राटदाराक दोन फावटी नोटीस धाडिल्ली. पूण ताणें नोटिशीक दाद दिवंक नाशिल्ल्यान कंत्राटदाराचेर दंडात्मक कारवाय करपाचो निर्णय काल जाल्ले बसकेंत घेतिल्ल्याचें नगराध्यक्ष रितेश नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
