भांगरभूंय | प्रतिनिधी
फोंडें, प्रतिनिधी: निरंकालाच्या दुदसागर न्हंयेच्या उदकाची पातळी वाडिल्ल्यान फोंडें – दाबाळ मार्गावेली येरादारी सुमार २० वरां ठप्प जाली. ताका लागून सगळी येरादारी धारबांदोडें मार्गान वळयली. जाल्यार धारबांदोडो पंचायत वाठारांतल्या दावकोण गांवांत वचपी रस्तो आयतारा सांजेवेळार ते सोमारा सकाळ मेरेन उदका पोंदा गेलो.
निरंकाल दर वर्सा रस्तो उदका पोंदा वता. आयतारा सांजेवेळार दूधसागर न्हंयेंतल्या उदकाची पातळी वाडिल्ल्यान हो रस्तो येरादारी खातीर बंद जालो. हो रस्तो सोमारा दनपरां उदकाची पातळी उणी जाले उपरांत उक्तो जालो. मागीर फोंडें- दाबाळ मार्गांवेली येरादारी सुरळीत सुरु जाली.
तशेंच दुदसागर न्हंयेच्या उदकाची पातळी वाडिल्ल्यान दावकोण गांवांत वचपी रस्तो आयतारा सांजेवेळार उदका पोञदा गेलो. ताका लागून आयतारा रातीं गांवांतल्या लोकांचेर आपलीं वाहनां पुला लागसारा दवरपाची वेळ आयली. सोमारा सकाळीं उदकाची पातळी उणी जाले उपरांत रस्त्यावयल्यान येरादारी सुरू जाली.
हे परिस्थितीचेर लक्ष दवरपा खातीर कुळे पुलीस तैनात केले. निरीक्षक सगुण सावंत हांच्या मार्गदर्शना खाला पुलीस तैनात केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
