भांगरभूंय | प्रतिनिधी
एक दुचाकी चिड्डली, जाल्यार दुसरो दुचाकी चालक जखमी
भांगरभूंय । प्रतिनिधी
फोंडें: फोंडें वाठारांत फाटल्या कांय दिसां सावन अपघाताचें सत्र चालूच आसा. आयतारा मध्यानरातीर 2 वरांच्या सुमाराक वाजे शिरोड्यां एके दुचाकीचो धपको चुकोवपाच्या यत्नांत नियंत्रण गेल्ल्यान ट्रक रस्त्याचे कुशीक आशिल्ल्या संदेश नायक हांच्या घराच्या आंगणांत पडलो. त्या वेळार संदेश नायक हाचे मालकीची स्कुटर ट्रका खाला चिड्डली. अपघातांत दुचाकी चालक (नांव कळूंक ना) जखमी जाला. जखमीचेर गोमॅकाँत उपचार चालू आसात.
मेळिल्ले म्हायती प्रमाण जीए 09 क्यू 9207 नंबराची दुचाकी बोरये सावन सांवड्ड्यां वताली. त्या वेळार अचकीत जीए 05 टी 5730 नंबराचो ट्रक मुख्य रस्त्याचेर आयलो. त्या वेळार ट्रक चालकान दुचाकीचो धपको चुकोवपा खातीर ट्रक दावे वटेन घुंवडायलो, त्या वेळार चालकाचें नियंत्रण गेलें. ह्या वेळार ट्रकाक दुचाकीचो धपको बसलो. ते उपरांत ट्रक रस्त्याचे कुशीक आशिल्ल्या संदेश नायक हाच्या घरा मुखा वयल्या आंगणांत पडलो. जखमी दुचाकी चालकाक पयलीं शिरोडें भलायकी केंद्रांत दाखल केलो. ते उपरांत अदीक उपचारा खातीर गोमॅकाँत व्हेलो. फोंडें पुलिसांनी अपघाताचो पंचनामो केलो.
शिरोड्यां येरादारेची कोंयडी
शिरोडेंच्या कामाक्षी देवळांत सोमारा उमास आशिल्ल्यान भाविकांनी गर्दी केल्ली. तातूंत वाजे वाठारांत घरा मुखा वयल्या आंगणांत ट्रक कोसळिल्ल्यान येरादारीचेर परिणाम जालो. रस्त्याच्या दोनूय वटांनी गाडयांच्यो लांब रांको लागिल्ल्यो. फोंडें येरादारी पुलिसांनी घडणुकेचे सुवातेर धांव घेवन येरादारी सुरळीत करपाचो यत्न केलो.
बरकटे- मोल्यां मोटारीचो अपघात
बरकटे- मोलेचे देंवतेर सोमारा सकाळीं ब्रेक निकामी जाल्ल्यान मोटारीचो धपको रस्त्याचे कुशीक आशिल्ल्या कठड्याक बसलो. अपघाता वेळार मोटार चालक एकलोच आशिल्लो. ह्या अपघातांत चालक बरे भशेन वाटावलो. ही मोटार कळंगूटे सावन कर्नाटकांत वताली. अपघातांत मोटारीचें व्हड प्रमाणांत लुकसाण जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
