भांगरभूंय | प्रतिनिधी
भांगरभूंय । प्रतिनिधी
म्हापशेंः हॉस्पिटॅलिटी वेवसायीक नरोत्तम ऊर्फ निम्स धिल्लन (77) हाच्या खून प्रकरणांतल्या कुणाल रामस्वरुप खतीक(24, दतिआ, मध्यप्रदेश) ह्या तिसऱ्या दुबावितांक पुलिसांनी अटक केली. ह्या प्रकरणांत पूजा (नीतू) राहुजा आनी जितेंद्र साहू ह्या मध्यप्रदेशांतल्या दुबावितांक हाचे पयलीं अटक केल्या.
धिल्लन हाचे कडेन रूम बुकींग करपाक आशिल्ल्या खतीक हाणेच ताका ब्लॅकमेलींग करपाचो कट रचून ते खातीर जितेंद्र आनी पूजा हिका तातूंत वांटेकार करून घेतल्लें. मात ह्या कटाची म्हायती धिल्लन हाका मेळटगीर ताचो तांणी खून केलो. खतीक हाका अटक केल्या उपरांत ताणे सगल्या प्रकाराचेर उजवाड घातलो. मार्रा- पिळर्ण हांगा 4 फेब्रुवारीक हे खून प्रकरण घडिल्लें. आपल्या व्हिलांत धिल्लन मेल्ले स्थितींत कामगारांक मेळल्ले. ताच्या आंगावयले भागराची सरपळी आनी कडे आनी फॉर्च्यूनर गाडी गायब जाल्ली. वाशी टोल नाक्यार मुंबय पुलिसांनी कार चलोवपी जितेंद्र आनी पूजाक अटक करून पर्वरी पुलिसांचे सुवादीन केल्लें. गाडयेंत खतीक आशिल्लो पूण पुलिसांनी ती धरल्या उपरांत तो पळून गेल्लो.
दुबावीत जितेंद्र आनी खतीक हाणी धिल्लन हाका ब्लॅकमेलींग करपाचो कट रचलो त्या प्रमाण पूजा हिका ताचे कडेन इ्स्टाग्रामाचेर इश्टागत करपाक सागलें. एका म्हयन्या उपरांत धिल्लनान पूजा आपल्या व्हिलार मेळपाक यो म्हणून सांगलें. धिल्लन हाका सोरो पियेवपाक दिवंन उपरांत पूजा वांगडा ताचो व्हिडिओ काडून ताका ब्लॅकमेल करपाचो तिगांचोय बेत आशिल्लो. 3 फेब्रुवारीक रातयां पार्टे वेळार पूजा आनी जितेंद्रा शिवाय आनीक एक व्यक्ती व्हिलांत आयिल्ल्यान धिल्लन हाका दुबाव आयलो आनी ताणे आड्डी मारपाक सुरवात केली आनी ताका लागून तिगांनीय ताचो गळो अंदून खून केलो.
खतीक हाका धरपा खातीर पर्वरी पुलिसांचो पंगड मध्यप्रदेश आनी कर्नाटकांत गेल्लो. दोन फावट तो दतिआ आनी कर्नाटकांतल्या केजीएप जिल्हांतल्यान तो पुलिसांच्या हाताक लागलो ना. मध्यप्रदेशांत ग्वाल्हेर हांगा तो आशिल्ल्याची म्हायती मेळटगीर पुलीस पंगडान 23 फेब्रुवारीक थंय वचून ताका धरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
