भांगरभूंय | प्रतिनिधी
खबरां संस्था
कोची ः निमिषा प्रिया (केरळ) हे नर्सीक गोळाक लावपाची ख्यास्त यमनांतल्या अधिकाऱ्यांनी तात्पुरती मुखार धुकल्ल्या. ती खुनाच्या आरोपा खाला दोशी थारिल्ली. देखून तिका शरिया कायद्या प्रमाण मरणाची ख्यास्त दिल्या. तिका फाल्यां 16 जुलयाक फासार दिवपाचे आशिल्ले.
निमिषाक तिचो आदलो वेवसायीक भागीदार तलाल अब्दो महदी हाचो खून केल्ल्याच्या आरोपा खाला दोशी थारायिल्ली. महदीची कूड 2017 त उदकाचे एके टांकयेंत मेळिल्ली. ताचे कुडीचे पांच कुडके केल्ले. मात निमिषान आपूण ताचो खून करूंक ना, अशें म्हणिल्लें.
फांशीची ख्यास्त स्थगीत जाल्या आसली, तरी फक्त महदीच्या कुटुंबान तिका माफ केल्यारुच ती वाचपाक शकता. शरीया कायद्या प्रमाण, खून जाला ताच्या कुटुंबाक दियाह (ब्लड मनी) दिवन माफी मागपाक मेळटा. निमिषाच्या कुटुंबान आनी समर्थकांनी महदी कुटुंबाक दिवपाक 10 लाख डाॅलर (8 कोटी 59 लाख रुपया) जमयल्यात. मात महदी कुटुंबान आमकां पयशे नाकात, तिका गोळाक लायात अशें म्हणलां. आमकां तलालाच्या मरणाक लागून फाटलीं बरींच वर्सां खूब मानसीक त्रास जाल्यात, अशें ताच्या भावान सांगलें.
निमिषा 2008 त केरळांतल्यान यमनाक नर्स म्हूण नोकरेक गेल्लें. सध्या तें 34 वर्सांचें आसा. ताका 2020 वर्सा मरणाची ख्यास्त दिल्ली. उपरांत सर्वोच्च न्यायालयानूय ती ख्यास्त कायम दवरिल्ली.
तलाल आनी निमिषान 2014 त क्लिनीक सुरू केल्लें. मागीर वेवसायांत मतभेद जाल्ल्यान तांची भागीदारी संकश्टांत सांपडिल्ली. तलालान निमिषाचो पासपोर्ट, पयशे चोरले आनी ताचेर अत्याचार केले, असो निमिषाच्या कुटुंबान आरोप केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
