भांगरभूंय | प्रतिनिधी
पेडणें तालुक्यांतल्या तोर्श्यां गांवांत काल दनपरां भिरांकूळ अपघात जालो, ताका जापसालदार कोणाक धरपाचो? गाडयेकाराक काय रस्त्यां वयल्या फोंडांक? मेळिल्ले म्हायती प्रमाण, अचकीत मुखार फोंडकुल दिशिल्ल्यान बायलेन गाडी कुशीक घेवपाक लायली आनी गाडयेचो ट्रकाक नेटाचो धपको बसलो. ह्या अपघातांत ती बायल आनी तिचो देड वर्सांचो चलो आक्ताक सोंपलो, तर घोव आनी दोन चलयो गंभीर जखमी जाल्यात. हें पुणेचें दांपत्य. पियुष गुंडेचा हे अल्फा केमिकल्स कंपनीचे वेवस्थापकी संचालक. तांचो हांसतो खेळटो परिवार विस्कटलो. थळावे म्हणटात, पत्रादेवी ते धारगळ मेरेनचो रस्तो इबाडला. ताचें काम कांसवा गतीन चलता. वाटेर साबार सर्व्हीस रस्ते. मुख्य रस्त्या वयल्यान भितर गांवांनी वचपाची वाट थळाव्यांकूच वा सद्दां प्रवास करप्यांकूच कळपाची. कारण खंयच दिका दाखोवपी फलक लायिल्ले नात. पणजी -म्हापसा रस्त्याचेरुय कांय म्हयन्यां पयलीं हीच परिस्थिती आशिल्ली. पणजेच्यान येवपी गाडयो करासवाड्यार वचपाच्या रस्त्याचो फलक नाशिल्ल्यान दाव्यान सकयल देंवनासनात सरळ पेडण्यां वताल्यो. हालीं हालीं मेरेन कांय गांवांनी वचपाक सर्व्हीस रस्तेच करूंक नाशिल्ले. आयज आसात, पूण अनवळख्याक ते सोदताना त्रास जातात. पणजेच्यान पेडण्यां वतना कांय कडेन अजून लायट ना. ताका लागून रस्तो बांदपाक सुरवात जाल्या त्या दिसाच्यान आतां मेरेन काळखांत रस्त्याचो अदमास येवंक नाशिल्ल्यान जायत्या जाणांक जीव वगडावचो पडला. फोंड, दिका दर्शक ना म्हूण अपघात जाल्यात ते वेगळे.
तोर्शे आनी हेर कडल्या वाठारांतल्या लोकांनी हो अपघात जाला तो म्हामार्ग बेगीन नीट करचो म्हूण बरींच निवेदनां दिल्लीं. पूण कोणेंच काना- मनार घेतलें ना. खुद्द पंचायतींनी थाराव घेवन ते बांदकाम खातें, सरकाराक सादर केले. इतलेंच न्हय, तर थळाव्या आमदारांनीय आवाज काडलो. तरीय खंयचे कडेन कांय ना. हाचो अर्थ सरकारा परस हो रस्तो तयार करपी पेजाद म्हणपाचो! साबार खबरां चॅनलांनी, दिसाळ्यांनी म्हामार्गाच्या कामा विशीं कांय म्हयन्यां पयलीं कागाळ करपी खबरो छापून आयल्यात. सोशल मिडियाचेरूय हो विशय गाजला. सगले आपापले परीन आवाज करतात. तरीय कोणाकूच कॅर करीनासतना काॅण्ट्रेक्टर कंपनी कानार येता तें फाफडून संथ गतीन चलपी हतया प्रमाण मुखार वचत आसा. आतां आवाज करपी तांचे नदरेन कोण, ते आमचे आमीच थारावया. जी मनमानी चल्ल्या ती लोकशाय पद्दतीक सोबना. सरकारी यंत्रणांनी हें मतीत घेवपाक जाय.
पुलिसांची जीप रातची गस्त घालता तशे बांदकाम अधिकाऱ्यांनी वा म्हामार्गाचे देखभालीचें काम करपी संबंदितांनी दिसाचें सगल्याक भोवन रस्त्याचे अवस्थेची पळोवणी करची. म्हणजे खंय दुरुस्ती, डांबरीकरणाचें काम करपाक जाय तें कळटलें. कारण म्हामार्ग म्हणटकच गाडयो 80 ते 100 स्पीडीन वतात. वाटेर एक फोंड मेळ्ळो वा खंय वच्चें तें कळना जावन गाडयेकार आबूज जालो जाल्यार हें अपघाताक निमित्त पुरो. तोर्श्यां काल त्या जाग्यार फोंड नाशिल्लो जाल्ल्यार एक कुटुंब तुटपा पसून वाटावपाचें. निदान आतां तरी हो रस्तो जाग्यार घालचो. थंय दुरुस्ती करचीच, पूण शक्य आसल्यार एक येरादारी पुलीसूय दवरचो.
गाडयेन 200, 300 किलोमिटर प्रवास सगलेच करीनात. तरीय रस्त्यार गाडयो वाडल्यात. गोंयांतूय
हीच परिस्थिती. कारण बेभरंवशाची भौशीक येरादारी. बस येतली काय ना हाची खात्री प्रत्यक्ष ब्रह्मदेव पसून दिवपाक शकना, म्हणटकच बशीन वचूं काय स्कूटर भायर काडूं हें लोक खंयच्याच देवाक विचारूं शकनात! ड्रग्स, बांगलादेशींचो विशय हातान घेतला तेच तरेन अपघात उणे करपाक सरकारी यंत्रणांनी पेंगट बांदून वावराक लागचें. पंचायतींनी रस्त्यां विशीं निवेदनां धाडल्यांत, तीं बेगीन हाता वेगळीं करचीं. भायल्यान येवपी वा राज्यांतर्गत येरादारी करपी गाडयेकारांनी स्वताची काळजी घेवपाची गरज आसा. कारण सगल्यांकूय रस्ते तोंडपाठ नासतात. हातांत स्टेरिंग आयलें वा गाडयेंत बसलो काय वराक 90 किलोमिटर वेगान गाडी चलोवपाकूच जाय, अशें खंयच्याच शास्त्रांत बरयिल्लें ना. रुंद टायराच्यो मोटारसायकली चलोवपी असलीं मस्तेपणा चड करतात. घरा कडेन कोण तरी आपली वाट पळयता, इतलें पसून तकलेंत घट धरलें जाल्यार अपघातांचेर नियंत्रण येतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
