भांगरभूंय | प्रतिनिधी
इंग्लंडा आड बाकी आशिल्ल्या तीन टॅस्टी खातीर भारताच्या पंगडाच्या घोशणा केली. 17 वांगड्यांच्या पंगडांतल्यान विराट कोहली आनी श्रेयस अय्यर भायर आसात. जाल्यार रवींद्र जडेजा आनी लोकेश राहुल हांचें पुनरागमन जालां.
फास्ट बॉलर जसप्रीत बुमरा लेगीत उरिल्ल्या मॅचींनी खेळटलो. थाकाय मेळची म्हणून बुमराक दोन टॅस्टींतल्यान भायर दवरतले अशी कांय दिसां पयलीं चर्चा आशिल्ली. पूण, हे चर्चेक काल पुर्णविराम लागलो. निमाण्यो तीन टॅस्टी राजकोट, रांची आनी धर्मशाला हांगा जातल्यो.
भारतीय क्रिकेट नियामक मंडळाची (बीसीसीआय) शुक्रारा बसका जाली. बसके पयलीं विराट कोहलीन आपूण उपलब्ध नासतलो अशें बीसीसीआयक कळीत केल्लें. वैयक्तीक कारणाक लागून सुरवातीच्या दोन टॅस्टींनी लेगीत तो खेळूंक नाशिल्लो.
मजगतीं, दुसरे टॅस्टीत खेळूंक नाशिल्ल्या जडेजा आनी राहुलाचें पुनरागमन जालां. पयले टॅस्टींत दोगूय जखमी जाल्ले, ताका लागून तांकां दुसरी टॅस्ट चुकील्ली. ते पुर्ण तंदुरुस्त आसतले तेन्नाच तांचो निमाण्या इकरांत आस्पाव करतले अशें निवड समितीन म्हणलां.
श्रेयस अय्यराचे फाटीक दुखापत जाल्ल्यान ताका उरिल्ली माळ चुकतली. दुसरे टॅस्टी उपरांत फाट दुखता अशी कागाळ बीसीसीआय कडेन केल्ली. पयल्या दोन टॅस्टींनी ताका खाशेलें प्रदर्शन करपाक जमूंक नाशिल्लें. चार डावांनी खेळटना ताका एक लेगीत अर्द शेंकडो मारपाक जमूंक ना.
सुवातीच्या दोन टॅस्टींनी खेळटना 15 विकेटी घेवपी पुर्ण माळे खातीर उपलब्ध आसा. पोरूं ऑक्टोबर-नोव्हेंबरांत जाल्ले संवसारीक वन डे क्रिकेट सर्ती उपरांत तो सेगीत खेळत आसा. ताका लागून ताका विसव दिवपाची शक्यताय आसा अशी चर्चा आशिल्ली.
दुसरे टॅस्टींत खेळूंक नाशिल्ल्या मोहम्मद सिराजाचें लेगीत पुनरागमन जालां. फास्ट बॉलर आकाशदीप हाची लेगीत निवड केल्या. जाल्यार मध्य प्रदेशाच्या आवेश खानाक रणजी करंड सर्तींत खेळपा खातीर राष्ट्रीय पंगडांतल्यान मेकळो केला.
दुसरे टॅस्टी वरवीं आंतरराष्ट्रीय क्रिकेटींत पदार्पण करपी रजत पाटीदारान पंगडांतली आपली सुवात कायम राखपाक येस मेळयलां. तशेंच सरफराज खान लेगीत पंगडांत आसा. कोहली आनी श्रेयस उपलब्ध नाशिल्ल्यान तिसरे टॅस्टींत हातूंतल्यान एकल्याक परतून खेळपाची संद मेळुये.
पांच टॅस्टींचे माळेंत दोनूय पंगड 1-1 अशे बरोबरींत आसात. हैदराबादांत जाल्ली पयली मॅच इंग्लंडान 28 धांवड्यांनी जिखिल्ली, जाल्यार विशाखापट्टणमांत जाल्ले दुसरे मॅचींत भारतान 106 धांवड्यांनी व्हड जैत जोडिल्लें. तिसरी मॅच 15 फेब्रुवारी सावन राजकोटांत सुरू जातली, चवथी मॅच 23 फेब्रुवारी सावन रांची शारांत आनी 7 मार्च सावन पांचवी टॅस्ट धर्मशालांत सुरू जातली.
पंगड असोः रोहीत शर्मा (मुखेली), यशस्वी जयस्वाल, शुभमन गील, लोकेश राहुल*, रजत पाटीदार, सरफराज खान, केएस भरत (विकेटकीपर), ध्रुव जुरेल (विकेटकीपर), रवींद्र जडेजा*, रविचंद्रन अश्विन, अक्षर पटेल, कुलदीप यादव, वॉशिंग्टन सुंदर, जसप्रीत बुमरा, मोहम्मद सिराज, मुकेश कुमार आनी आकाश दीप.
*राहुल आनी जडेजा हे तंदुरुस्त घोशीत केल्या उपरांतूच खेळपाक शकतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
