भांगरभूंय | प्रतिनिधी
पणजी : कांय म्हयन्यां सावन फरारी आशिल्लो ३७ वर्सां पिरायेचो अंतू रॉय हाका वेर्णा पुलिसांनी आसामांतल्यान ताब्यांत घेतल्या. केसरवाळ-कुठ्ठाळीच्या ४० वर्सां पिरायेचे बायलेन दाखल केल्ले कागाळीवेल्यान गुन्यांव नोंद केल्लो.
नेमकें प्रकरण कितें?
रॉय हांणी २०१५ सावन लग्नाचें हांयस दाखोवन कागाळदार बायले वांगडा शरिरीक संबंद दवरले. मात उपरांत लग्नाक न्हयकार दिवन तिका फटयली. तशेंच तिचे अश्लील व्हिडिओ आनी फोटो व्हायरल करून तिचो मानसीक छळ केल्ल्याचो आरोप आसा.
ह्या प्रकरणांत डिसेंबर २०२४ वर्सा वेर्णा पुलीस स्टेशनांत गुन्यांव दाखल केलो. ह्या प्रकरणांत नोटिसो धाडूनय रॉय तपासाक येवंक ना. वेर्णा पुलीस उपनिरीक्षक महेश भोमकार आनी हेड कॉन्स्टेबल गिरीश नायक हांच्या पंगडान सोद मोहीम राबोवन २२ ऑगस्टाक आसामच्या कछार जिल्ह्यांतल्या लखीपूर हांगा ताका अटक केली. थळाव्या न्यायालया कडल्यान ट्रान्झिट रिमांड मेळोवन २३ ऑगस्टाक ताका वेर्णा पुलीस स्टेशनांत हाडून अटक केली.
दुबावितान पिडसेत बायले कडल्यान पयशे घेवपाचो डाव रचिल्लो अशी म्हायती पुलीस तपसांतल्यान मुखार आयली. तशेंच अश्लील फोटो प्रसारीत करपाक वापरलेली इलेक्ट्रॉनीक उपकरणां सोदपाचेंय काम सुरू आसा.
ह्या प्रकरणाचो तपास दक्षिण गोंय पुलीस अधीक्षक टिकमसिंह वर्मा, वास्कोचे उपअधीक्षक गुरुदास कामत हांच्या मार्गदर्शना खाला तशेंच वेर्णा पुलीस स्टेशनाचे निरिक्षक आनंद शिरोडकार हांच्या नेतृत्वा खाला सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
