भांगरभूंय | प्रतिनिधी
माशेल: बेतकी खांडोळाच्या उपसरपंच संजीवनी तळेकार हांचेर फाटल्या सप्तकांत पांच पंच वांगड्यांनी फोंडें गट विकास कार्यालयांत अविश्वास थाराव दाखल केल्लो. ह्या थारावाचेर सोमारा सकाळीं पंचायत कार्यालयांत चर्चा जाली आनी निमाणे कडेन थाराव संमत जालो.
अविश्वास थारावाचे वटेन पंच वांगडी मनोज कुमार नायक गांवकार, उदय नायक, दिलीप नायक, निकिता फडते आनी श्रद्धा फडते हांणी सयो केल्यो. जाल्यार आदले सरपंच विशांत नायक, उपसरपंच संजीवनी तळेकार आनी हेर दोग पंच वांगडी हजर रावंक ना.
सरपंच आनी उपसरपंचांचेर हाडिल्ले अविस्वास थाराव फाटोफाट संमत जाल्ल्यान दोनूय सुवातो सध्या रिकाम्यो जाल्यात. नव्या सरपंचाची निवड जायसर पंचायतीचो सदचो कारभार चलोवपा खातीर गटविकास अधिकार्यांच्या कार्यालया कडल्यान प्रशासकाची बेगीनूच नेमणूक करतले, अशें फोंडें गटविकास अधिकारी अश्विन देसाय हांणी सांगलें. हो अविश्वास थारावा विशीं संबदीत पंचायत सचिव विनोद शेटकार हांणी कामकाज पळयलें. ह्या वेळार गट विकास कार्यालयांतल्यान निरीक्षक सोमनाथ तारी हांणी निरीक्षक म्हणून काम पळयलें. सध्या एकंदर वातावरण पळयल्यार आतांचे पंच आनी आदले सरपंच दिलीप नायक हांच्या गळ्यांत सरपंच पदाची माळ पडपाची दाट शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
