भांगरभूंय | प्रतिनिधी
मुंबय, खबरां संस्था: फाटल्या ११ दिसां सावन सुरू आशिल्लो महायुतींतलो ‘हाय-व्होल्टेज ड्रामा’ निमाणो सोंपलो. देवेंद्र फडणवीस हांचो मुख्यमंत्रीपदाचो मार्ग निमाणो मेकळो जालो. पक्षाचे कोअर कमिटीचे बसकेंत देवेंद्र फडणवीस हांची विधीमंडळाचे फुडारी म्हणून निवड जाली. ताका लागून फडणवीस हेच मुख्यमंत्री जातलें हें स्पश्ट जालें. फाल्यां ५ डिसेंबराक फडणवीस हांचो आझाद मैदानाचेर भव्यदिव्य असो सोपूत विधी सुवाळो जावपाचो आसा. प्रधानमंत्री नरेंद्र मोदी ह्या सुवाळ्याक हाजीर रावतले. मुख्यमंत्रीपदाच्या सोपूत विधी उपरांत महाराष्ट्र राज्याचे २१ वे मुख्यमंत्री म्हणून फडणवीस राज्याचो कारभार सांबाळटले.
विधीमंडळ बसकेंत कितें घडलें?
महाराष्ट्रांतल्या विधानसभा वेंचणुकेचो निकाल २३ नोव्हेंबराक जाहीर जालो. हातूंत महायुतीक स्पश्ट भोवमत मेळ्ळें आनी भाजप हो सगय्यांत व्हड पक्ष थारलो. निकाला उपरांत १० दीस जावन गेले, तरी मुख्यमंत्री कोणाक करचो, हें थारनाशिल्लें. महायुतीची शिवसेना, राष्ट्रवादी कॉंग्रेसीच्या आमदारांनी आपापल्या विधिमंडळ गट फुडार्याची निवड केल्या. मात सगळ्यांत व्हड पक्ष थारिल्ल्या भाजपा वतीन विधिमंडळ गट फुडार्याची निवड जावंक नाशिल्ली. हेच फाटभूंयेर भाजपा वतीन आयज ४ डिसेंबराक विधिमंडळ गट फुडार्याची निवड करपाची म्हत्वाची बसका विधीमंडळांत जाली.
सत्तास्थापनेच्या हालचालींक वेग
महाराष्ट्रांतल्या सत्तास्थापनेच्या हालचालींचो वेग आतां वाडला. केंद्रीय निरीक्षक विजय रुपाणी आनी निर्मला सीतारमण हांचे हाजेरींत विधिमंडळ पक्ष फुडारी पदार शिक्को दिलो. देवेंद्र फडणवीस हांची विधिमंडळ गट फुडारी पदार निवड जाले उपरांत निमाणें सत्तास्थापनेचो मार्ग मेकळो जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
