भांगरभूंय | प्रतिनिधी
नवी दिल्ली, खबरां संस्था: फाटल्या दोन दिसां सावन दिल्लीच्या मुख्यमंत्री पदाचेर चर्चा सुरू आशिल्ली. दिल्लीच्या राजकी मंडळांत जायत्या नांवां विशीं चर्चा जाली. पूण प्रत्यक्षांत अरविंद केजरीवाल मुख्यमंत्री पदा खातीर कोणाचें नांव मुखार करतले हाचे कडेन सगल्यांचें लक्ष आशिल्लें. उपमुख्यमंत्री मनीष सिसोदिया हांचो सगळ्यांत पयलीं उल्लेख चर्चेंत जालो. पूण तांणी हें पद मान्य करपाक पयलींच न्हयकार दिल्लो. ते खातीर दिल्लीची शिक्षणमंत्री आतिशी मार्लेना हें नांव मुखार आशिल्लें. निमाणें तिच्या नांवाचेरुच म्होर बसली. ताका लागून आतां शीला दिक्षीत हांचे उपरांत दिल्लीक परत एक फावट बायल मुख्यमंत्री मेळटली. सध्या देशांत ममता बॅनर्जी ही एकलीच बायल मुख्यमंत्री आसा.
आम आदमी पक्ष विधीमंडळ पक्षाची बसका आयज जाली. हे बसकेंत आतिशी मार्लेना हांका विधीमंडळ पक्षाची फुडारी म्हूण वेंचून काडली. हे बसकेंत अरविंद केजरीवाल हाणी अतिशी हांचें नांव मांडलें. आप आमदारांनीय अतिशी हांच्या नांवाच्या प्रस्तावाक येवकार दिलो. अतिशी फुडल्या दोन ते तीन दिसांनी दिल्लीची मुख्यमंत्री म्हणून सोपूत घेतली.
आतिशी मार्लेना ही कोण?
आतिशी ही आम आदमी पार्टीची वरीश्ठ फुडारी आनी समाजीक कार्यकर्ती. तिचो जल्म ८ जून १९८१ दिसा दिल्लींत जालो. विजय सिंह तोमर आनी त्रिप्ता वाही हे तिचे आवय बापूय. मार्लेना हें तिचें मदलें नांव. मार्क्स आनी लेनीन हीं नांवां एक करून हें नांव तयार केलां. घोवाचें नांव प्रवीण सिंह. तिणें आॅक्फर्ड विद्यापीठ आनी मागदालेन काॅलेजींत शिक्षण घेतलां. तिणें समाजीक कार्यकर्ती म्हणून आपले भौशीक जिणेची सुरवात मध्यप्रदेशांत केल्ली. थंय ती सात वर्सां रावली. २०१३ त ज्येश्ठ समाजसेवक अण्णा हजारे हांच्या फुडारपणा खाला सुरू जाल्ल्या भ्रश्टाचारा आडच्या आंदोलनांत ती वांटेकार जाल्ली. सध्याच्या आम आदमी पार्टींतले चडशे फुडारी त्या आंदोलनालेच. मजगतीं, आतिशी ही केजरीवाल आनी हेर फुडार्यांच्या संपर्कांत आयली. फुडें तांणी आम आदमी पार्टी वरवीं राजकी कार्याक सुरुवात केली. ती दिल्लीच्या कालकाजी विधानसभा मतदारसंघांतल्यान आमदार म्हणून निवडून आयल्या. तिणें दिल्लीच्या शिक्षण मंत्री, भौशीक बांदकाम आनी पर्यटन मंत्री म्हणून काम केलां. ती आम आदमी पार्टीची संस्थापक वांगडीय जावन आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
