भांगरभूंय | प्रतिनिधी
मडगांव: मडगांव खारेबांधच्यान दोन दिसां आदीं अपहरण जाल्ल्याचो गुन्यांव दाखल जाल्ले चलये सयत, नावेली मांडप हांगच्यान शेणिल्ल्या दोन नेण्ट्या चल्यांचो मडगांव पुलिसांनी निमाणो सोद घेतलो.
मोड्डी मांडप, नावेलेच्या मोहम्मद अस्लम तांकी हांणी मडगांव पुलिशेंत कागाळ नोंद आशिल्ली. ते प्रमाण १८ नोव्हेंबराक तांची १४ वर्सां पिरायेच्या आनी ११ वर्सां पिरायेच्या दोगां चल्यांचें अनवळख्यांनी अपहरण केल्लें. मडगांव पुलिसांनी ह्या दोनाय चल्यांचो सोद घवपा खाती सीसीटीव्ही फुटेज आनी तांत्रीक देखरेखीचो वापर केलो. हे दोगूय चले उत्तर प्रदेशाक तांच्या मामाच्या घरा गेल्लयाचें तपासा वेळार समजलें.
हाचे मजगतीं, १६ नोव्हेंबराक मडगांव खारेबांधच्या नेण्टे चलयेच्या अपहरण प्रकरणांत सोद घेतना, ही चली दिल्लीक सांपडली. तीय आपल्या सोयर्यां गेर गेल्ली, अशें पुलिसांनी सांगलें.
नेण्टीं भुरगीं शेणिल्ल्याची कागाळ दाखल जाले उपरांत, नेमा प्रमाण अपहरण जालें म्हणून गुन्यांव नोंद करचो पडटा, ते प्रमाण पुलिसांनी ह्या प्रकरणांतूय अपहरणाचो गुन्यांव नोंद केल्लो.
ह्यान पयलीं १० नोव्हेंबराक कोलवा पुलीस स्टेशनांत सध्या माजोर्डा रावपी आनी मूळ झारखंडची पूनम केरकेट्टा हांणी आपल्या १४ वर्सां पिरायेच्या पुता सयत ताच्या आनीक दोगां नेण्ट्या चल्यांचें अनवळख्यांनी अपहरण केल्ल्याची कागाळ केल्ली. उपरांत कोलवा पुलिसांनी तांत्रीक देखरेखी वरवीं ह्या भुरग्यांक कोझिकोडे, केरळ हांगच्यान सोदून हाडले आनी तांच्या पालकांचे सुवादीन केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
