निमाणें खाप्रेश्वर देवस्थान काडलेंच

भांगरभूंय | प्रतिनिधी

सुकूर वाठारांत वडाचें स्थलांतर

भांगरभूंय । प्रतिनिधी

म्हापशें : पर्वरी वडा कडलें श्रीदेव खाप्रेश्वर देवस्थान आनी वड निमाणो सोमारा 3 मार्चाक थंयच्यान दुसरे कडेन व्हेलो. प्रशासनान तज्ञांचे देखरेखी खाला सुकूरच्या पर्वरी घाणयारें उदक प्रक्रिया प्रकल्पा लागसार वड परतून लायलो. जाल्यार श्रीदेव खाप्रेश्वराची मूर्त कंटेनरांत सुरक्षीत दवरल्या. सरकारा वतीन हे मुर्तीची लेगीत वडा कुशिकूच पुनर्प्रतिश्ठापना करतले.

आयतारा दीसभर शेंकड्यांनी भाविकांनी वड तशेंच देवस्थान काडपाक विरोध केल्लो. पूण पुलीस बंदोबस्तांत राष्ट्रीय म्हामार्ग प्राधिकरणान हें काम हातांत घेतिल्लें. पूम रातीं उशीर जाल्ल्यान तें काम बंद केलें.

मूर्त काडपाचें बंद केल्लें काम सोमारा फांतोडेर 3 वरांच्या सुमाराक प्रशासनान खर पुलीस बंदोबस्तांत परतून चालू केलें. क्रेन, जेसीबी आनी कटराचे मजतीन वड आनी देवाची मूर्त काडली. ह्या वेळार कांय भावीक देवस्थाना कडेन हाजीर आशिल्ले. वड आनी मूर्त काडटना भावीक निरशेल्ले. प्रशासकीय यंत्रणेच्या कामांत तांणी आडखळ हाडूंक ना. देवाची मूर्त आनी वड काडले उपरांत लोकांनी देवस्थानाचे सुवातेर देवपुजा केली आनी ते थंयच्यान गेले.

ते परांत प्रशासकीय यंत्रणेन देवाची मूर्त हाडून सुकूर पोरणो बाजारांतले देंवतेर उड्डाण पुलाच्या कंत्राटदाराच्या कंटनेरांत सुरक्षीत दवरली. तशेंच काडिल्लो वड कंटनेर ट्रकांतल्यान उखलून सुकूर म्हामार्गा लागसार लायलो. वड लावपाचें काम रातीं उसरां मेरेन चालू आशिल्लें.

मजगतीं, सुकूरांत जे सुवातेर खाप्रेश्वर देवस्थानाच्या वडाचें स्थलांतर केलां थंय हे आदीं वड तशेंच हेर झाडांचें पुनर्रोपण केलां. ही सुवात पर्वरी घाणयारें उदक प्रक्रिया प्रकल्पा लागसार आसा. घाणयारें उदक प्रक्रिया प्रकल्पाची आनी उड्डाण पुला खातीर खणिल्ले मातयेचो भराव राष्ट्रीय म्हामार्ग प्राधिकरणान थंय हाडून उडयला.

काँग्रेसीची बजरंग दलाचेर टिका

छत्रपती शिवाजी महाराजां विशीं विधान करपी अ‍ॅड. उदय भेंब्रे हांच्या घरा रातच्या वेळार वचून तांकां जाब विचारपी बजरंग दला सयत हेर हिंदुत्ववादी राखणदार आशिल्ले, खाप्रेश्वराची मूर्त काडटना खंय आशिल्ले, असो प्रस्न प्रदेश काँग्रेसीचे उपाध्यक्ष सुनील कवठणकार हांणी सोमारा उपस्थीत केलो. पणजेच्या काँग्रेस भवनांत घेतिल्ले पत्रकार परिशदेंत ते उलयताले. ह्या वेळार तांचे वांगडा तुलियो डिसोझा हाजीर आशिल्ले.

म्हामार्गाच्या रुंदीकरणाचें कारण दिवन सरकारान पर्वरीचो 200 वर्सां आदलो वड आनी खाप्रेश्वर देवस्थानाचें स्थलांतर करपाचो निर्णय घेतलो. खाप्रेश्वर देवस्थान आनी वड थंयच्यान काडपाची मातय गरज नाशिल्ली. सरकाराचे हे कृतीचो प्रदेश काँग्रेसी वतीन आपूण निशेध करतां, अशें कवठणकार हांणी सांगलें.

विरोध करप्यांनीच संमती दिल्ली : रोहन खंवटे

आपूण जेन्ना 2019 ते 2022 ह्या काळांत विरोधी पक्षांत आशिल्लो तेन्नाच आयज जे लोक खाप्रेश्वर देवूळ आनी वड काडपाक विरोध करताले तांणी स्थलांतरणाक संमती दिल्ली. संमती नेम आनी अटींचेर जांणी सयो केल्ल्यो त्यो सरकारा कडेन आसात. ह्या भाजपांतल्याच लोकांनी त्या वेळार कालच्या आंदोलना सारकें पावल उखलपाक जाय आशिल्लें. मात आतां ताचें राजकारण करतात, असो आरोप थळावे आमदार तशेंच मंत्री रोहन खंवटे हांणी केलो.