भांगरभूंय | प्रतिनिधी
जोयडा : सध्या लग्नाचो, परबांचो हंगाम सुरू जाला. हाका लागून गोंयच्यान जायते लोक कपडे वा हेर सामान विकत घेवपा खातीर बेळगांवां वतात. गोंयच्यान बेळगांवां वतना जायते जाण अनमोड घांटाचो मार्ग वापरतात. कर्नाटकांतल्यान येवपी भाजीपालो आनी हेर म्हत्वाच्या सामानाची येरादारीय ह्याच मार्गा वेल्यान जाता. मात जायते फावट प्रवाशांक ह्या घांटार येरादारी कोंयडीचे त्रास सोंसचे पडटात. काल सांजेवेळार ५:३० वरांचेर ह्या घाटावेल्या वोल्ताचेर २० चाकी जड ट्रक कांय तांत्रीक कारणांक लागून बंद पडिल्लो. हाका लागून हांगा बरीच व्हड येरादारी कोंयडी जाल्ली. निमाणो आयज दनपरां तो ट्रक क्रेनीचे मजतीन कुशीक काडलो. सुमार १७ वरां उपरांत ही येरादारी कोंयडी सुरळीत करपाक रामनगर पुलिसांक येस आयलें.
हे विशीं चड म्हायती प्रमाण, अनमोड घांटार काल जाल्ली येरादारी कोंयडी आयज दनपार मेरेन तशीच कायम आशिल्ली. ट्रक जंय बंद पडिल्लो थंयच्यान बारीक चारचाकी वाहनां सोडटाले. मात थंयच्यान जड वाहनांक, बसींक वचपाक सुवात नाशिल्ल्यान त्यो थंयच रस्त्या कुशीक उरल्यो. हाका लागून रस्त्याचे दोनूय वटेन वाहनांच्यो रांको लागिल्ल्यो. ही कोंयडी सोडोवपाक रामनगर पुलीसूय हांगा आयिल्ले. आयज दनपरां घांटार इबाडिल्लो ट्रक क्रेनीचे मजतीन कुशीक काडलो आनी फाटल्या १७ वरां सावन आडकून उरिल्ली येरादारी सुरळीत करपा खातीर रामनगर पुलिसांक येस आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
