भांगरभूंय | प्रतिनिधी
फ्लोरिडा, खबरां संस्था: भारतीय वंशाची अमेरिकन अंतळार वीर सुनीता विल्यम्स आनी बुच विल्मोर ९ म्हयने आनी १४ दिसांनी धर्तरेर पावलीं. तांचे वांगडा क्रू-९ चे आनीक दोन अंतळार वीर आसात. अमेरिकेचे निक हेग आनी रशियाचे अलेक्झांडर गोर्बुनोव्ह. तांचें ड्रॅगन अंतळार यान १९ मार्चाक भारतीय वेळे प्रमाण सकाळीं ३:२७ वरांचेर फ्लोरिडाचे दर्यादेगेर देंवलें.
ह्या चार अंतळार विरांनी मंगळारा आंतरराष्ट्रीय अंतरीक्ष स्टेशन (ISS) सोडलें. जेन्ना हें अंतळार यान धर्तरेच्या वातावरणांत आयलें तेन्ना ताचें तापमान १६५० अंश सेल्सिअसा परस चड आशिल्लें. ह्या काळांत सुमार ७ मिनटां संपर्क तुटलो, म्हळ्यार अंतळार याना कडेन कसलोच संपर्क जावंक ना.
अंतळार स्टेशनावेल्यान धर्तरेर परतुवपाक १७ वरां लागलीं
ड्रॅगन कॅप्सूल वेगळें जाल्ल्याक तें दर्यांत देंव मेरेन सुमार १७ वरां लागलीं. १८ मार्चाक सकाळीं ८:३५ वरांचेर, अंतळार यानाचें दार उघडलें. १०:३५ वरांचेर अंतळार यान आयएसएस सावन वेगळें जालें.
१९ मार्च दिसा सकाळीं २:४१ वरांचेर डीऑर्बिट लासपाक सुरवात जाली. म्हणल्यार, अंतळार यानाचें इंजिन कक्षा पसून विरुद्ध दिकेन चलयलें.हाका लागून अंतळार यान धर्तरेच्या वातावरणांत प्रवेश करपाक शकलें आनी सकाळीं ३:२७ वरांचेर फ्लोरिडाचे दर्यादेगेवेल्या उदकांत देंवलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
