भांगरभूंय | प्रतिनिधी
कर्नाटक उच्च न्यायालयाचो निकाल
कर्नाटक, खबरां संस्था ः भुरगीं नाशिल्ल्या बायलेच्या मरणा उपरांत तिच्या बापाय कडल्यान मेळिल्ली मालमत्ता परतून तिच्या वारसदारांक दितले असो निकाल कर्नाटक उच्च न्यायालयान हलींच दिला. हिंदू उत्तराधिकार कायदो, 1956 च्या कलम 15 (2) चेर आदारीत हो निर्णय घेतला. हिंदू बायल मेली आनी तिणे मरण पत्र केल्ले ना जाल्यार तिका ज्या कुटुंबांतल्यान मालमत्ता मेळ्ळी त्या कुटुंबाक ती परतून मेळटली अशें कायद्यांत स्पश्टपणान सांगलां.
जर मालमत्ता घोव वा सासरच्या न्यक्ती कडल्यान वारसाहक्कान मेळ्ळी जाल्यार ती घोवाच्या वारसदारांक दितले. भुरगीं नाशिल्ल्या कुटुंबांन आपल्या मरणा उपरांत मालमत्तेचें वारसो कोणाक दिवचो हांची येवजण जिवें आसतना करची. ते खातीर विस्वासू व्यक्ती उत्तराधिकारी आनी विश्वस्त म्हूण निवडपाक जाय.
लग्न जाल्ली बायल
हिंदू उत्तराधिकार कायद्याप्रमाण लग्न जाल्ली हिंदू बायल मेली आनी तिणें मरण पत्र केल्ले ना जाल्यार तिचे पूत, धुव आनी घोवाक तिची मालमत्ता वारसो म्हणून सगळ्यांत पयलीं मेळटा. हांतूतले कोणूच ना जाल्यार मागीर घोवाच्या कुटुंबाक आनी तेय ना जाल्यार मागीर आवय-बापायक मेळटली. आनी तोय पर्याय ना जाल्यार मागीर तो आवय-बापायच्या वारसदारांक वचूंक शकता.
भुरगीं नाशिल्लीं जोडपीं
भुरगीं नाशिल्ल्या जोडप्यांनी मालमत्तेचें नियोजन करतना दोगांयनी मालमत्तेच्या वांटपाखातीर वेगवेगळें वैयक्तीक इत्सा पत्र करचें. तुमकां ही मालमत्ता कोणाक दिवपाची आसा, ती कुटुंबांतलो वांगडी आसूं, इश्ट आसूं वा संस्था आसूं, हें विशीं तांतूत स्पश्ट करचें. तशेंच घोव वा बायल कोणूय पयलीं मेली जाल्यार दुसऱ्या जिवंत आशिल्ल्या जोडीदारान संयुक्त मालकीची मालमत्ता कशी वेवस्थापन करची हें इत्सा पत्रांत स्पश्ट करचें. तशेंच परस्पर संमतीन एकूच हत्सा पत्र करूं येता. पूण वेगवेगळें इत्सा पत्र आसल्यार दोनूय भागीदारांच्या इत्से प्रमाण वांटप करूं येता.
भुरगीं नाशिल्ले एकले आवय-बापूय
भुरगीं नाशिल्ल्या एकले आवय-बापायन (single parent) मालमत्तेची आपलें इत्से प्रमाण वांटणी करपाक कायदेशीर इत्सा पत्र तयार करचें. कुटुंब आनी भुरगीं नाशिल्ल्या पालकांक आपली मालमत्ता कोणाक दिवची तें निवडपाक अडचणी येवंक शकतात. तांका आपल्या इश्ट, हेर व्यक्तींच्या वा संस्थांच्या नांवान इत्सा पत्र करूं येता. तांणी इत्सा पत्र तयार करून विश्वस्तांची नेमणूक करप गरजेचें आसा. देखून एकल्या पालकांक कसल्योच आडमेळी येवच्यो नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
