निधी येवंक नाशिल्ल्यान प्रधानमंत्री ग्राम सडक येवजणे खालचे रस्ते प्रलंबीत

भांगरभूंय | प्रतिनिधी

विधानसभेंत मुख्यमंत्री डॉ. प्रमोद सावंत हांची लेखी जाप

पणजीः प्रधानमंत्री ग्राम सडक येवजणे खाला गोंयच्या गावगिऱ्या वाठारांत 12 रस्ते प्रस्तावीत आसात. पूण केंद्रांतल्यान अजून मेरेन ह्या रस्त्यां खातीर निधी येवंक नाशिल्ल्यान ह्या रस्त्याचें अजून मेरेन टेंडर काडपाचें आसा अशी म्हायती ग्रामीण उदरगत मंत्री ह्या नात्यान मुख्यमंत्री डॉ. प्रमोद सावंत हांणी लेखी जापेंत दिल्या.

हळदोणेंचे आमदार कार्लोस फेरेरा हांणी विचारिल्ल्या प्रस्नाक मुख्यमंत्री डॉ. प्रमोद सावंत हांणी विधानसभेच्या पटलार लेखी जाप दिल्या.

प्रधानमंत्री ग्राम सडक येवजणे खाला वर्स 2023-24सात गोंया खातीर केंद्रान 125 कोटी रुपयाची तरतूद केल्ली. देखून हे येवजणे खाला 5 मतदारसंघांत 12 रस्ते नव्यान बांदपा खातीर तशेंच दुरुस्त करपा खातीर 102 कोटींचो प्रस्ताव मांडिल्लो. पूण अजून मेरेन ह्या प्रस्तावा खातीर केंद्रातल्यान निधी येवंक ना आनी ह्या कारणांक लागून ह्या कामांचें टेंडर काडपाचें उरलां.

प्रस्तावीत रस्त्यां मदीं मयें मतदारसंघांत 6.54 कोटी रुपया खर्चून 5.89 किलोमिटर लांबायचो हातखांब रस्तो, 5.13 कोटी खर्चून 2.56 किलोमिटर आमोणें रस्तो, 4.32 कोटी खर्चून हातखांब 42 मिटराचो सांकव आनी सांखळे व्हाळवाट न्हंयचेर 36.26 कोटी खर्चून 200 मिटरचो पूल प्रस्तावीत आसा.

वाळपय मतदारसंघात 5.34 कोटी खर्चून सांवड्डें पूल ते करंजोळ मेरेन 4.54 किलोमिटर रस्तो प्रस्तावीत आसा.

सांवड्डें मतदारसंघात 5.15 कोटी खर्चून 4.92 किलोमिटर देवूळमळ ते आलोट रस्तो, 5.07 कोटी खर्चून 5.2 किलोमिटर शिगांव जंक्शन, 5.78 कोटी खर्चून 5.9 किलोमिटर बांदोळ ते कामारखाण रस्तो प्रस्तावीत आसा. प्रियोळ मतदारसंघात गंगानगर वाठारांत 5 कोटी खर्चून 5.33 किलोमिटराचो रस्तो प्रस्तावीत आसा.

शिरोडें मतदारसंघात 6.53 कोटी खर्चून शिरशिरें, देवूळवाड्यार 6.82 किलोमिटर रस्तो, 8.78 कोटी खर्चून बेतोडें- निरंकाल सेंट मेरीस रस्तो आनी 8.10 कोटी खर्चून निरंकाल हांगा 9.66 किलोमिटर रस्तो प्रस्तावीत आसा.

ह्या सगल्या कामांचें अजून मेरेन टेंडर काडपाचें उरलां.